Général
-
Alexandre IV (1254-1261)
-
Ne permittat ullum Monasterium, Claustrum, aut Oratorium Regularium ædificari infra spatium 300. passuum com. circa fines loci Fratrum Minorum Maceraten. (Ex Autographo Archivi dicti Conventus Maceraten.)
-
Anno 1257. die 13. Junii.
-
1257
-
ALEXANDER &c.
Venerabili Fratri ‥ Episcopo Racanaten.a Salutem, & Apostolicam Benedictionem.
Pagi, & quieti dilectorum filiorum Fratrum Minorum de Maceratab Firman., & Camerinen. Diœc.c volentes paterna sollicitudine providere, Fraternitati tuæ per Apostolica scripta firmiter præcipiendo mandamus, quatenus nullius Religionis Monasterium, seu Oratorium, aut Claustrum Religiosarum, vel Regularium personarum ædificare, vel construere, seu jam incoatum in opus progredi infra spatium trecentorum passuumd ad passum Communise circa omnes fines ipsorum loco contiguos, & vicinos aliquatenus non permittas. Non obstante aliqua Indulgentia impetrata a Sede Apostolica, vel etiam impetranda, per quam effectus præsentium impediri valeat, vel differri; & de qua in istis litteris plenam, & expressam oporteat fieri mentionem; Contradictores per censuram Ecclesiasticam, appellatione postposita, compescendo: Invocato ad hoc, si opus fuerit, auxilio brachii sæcularis.
Datum Viterbii Idibus Junii, Pontificatus Nostri Anno Tertio.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCCXXXVI., pp.223-224
-
(a) Episcopo Racanaten.: Bonavitæ al. Bonajunctæ Ord. Min. anno præcedenti evecto ex Ughello to. 1. Ital. Sacræ, & Salimbene Parmensi in Chron. Ms.
-
(b) De Macerata: De quibus diximus ad præcedentem Bullam die 9. Junii editam incip. Quoniam, ut ait Apostolus &c.
-
(c) Et Camerinen. diœc.: In quibusdam epistolis Pontif. dicitur tantum Firman. diœc., quia major pars agri Macerat. in ea diœcesi erat.
-
(d) Trecentorum passuum: Quam distantiam postea Clemens IV. extendit ad 300. cannas per decretalem Ad consequendam gloriam &c. pro omnium Religionum Mendicantium locis anno 1265. die 30. Novembris editam, etsi per aliam Quia plerumque &c. anno 1268. ad 140. retraxerit.
-
(e) Ad passum Communis: Nempe illius Civitatis: etiam anno præcedenti die 10. Julii eandem concessionem contulit Conventui Bononien. inquiens ad passum Civitatis Bononiensis, sed pro illo Asculanæ Civitatis in Piceno anno 1260. die 25. Augusti ad 300. cannas dilatavit.