« bullarium-franciscanum-1210 »

ALEXANDER &c.

Dilecto filio Plebano de Birbinaria Lucan. Diœcesis Salutem, & Apostolicam Benedictionem.

Cum mandatum sub certa forma per nostras litterasa accepisses, ut dilectis in Christo filiabus Abbatissæ, & Conventui Monasterii de Gattajola Ordinis Sancti Damiani Lucan. Diœcesis de aliquo Monasterio, vel loco Venerabili Fratri nostro ‥ Episcopo Lucan. non subjecto ejusdem Diœcesis deformato, & non valente de facili in suo reformari Ordine provideres, amotis exinde personis ipsius, & alibi collocatis; tu, intellecto Abbatem, & Monachos Monasterii de Fiscedob Ordinis Vallis Umbrosæc ad Romanam Ecclesiam nullo medio pertinentis dictæ Diœcesis a norma regularis observantiæ declinasse; ad eos, ut super hoc inquireres, descendisti; quibus ad inspectionem conversationis suæ te admittere contumaciter denegantibus, & per appellationis effugium evadere gestientibus; oculis inspecterisd tamquam mandati nostri diligens Executor super statu ejusdem Monasterii, & moribus, & vita Abbatis, & quorumcumque Monachorum, & personarum degentium in eodem, prout Nobis innotuit, testes plurimos recepisti. Sed licet perpendi ex dictis eorumdem Testium, quorum depositiones fuerunt exhibitæ coram Nobis; & ex fama publica videatur dictum Monasterium fore graviter deformatum; & eosdem Abbatem, & Monachos corrupisse ambulando post carnis concupiscentiam vias suas; ipsis tamen redimere satagentibus tempus, & judicium longis litigiorum protelationibus evitare; commissum tibi negotium in electione mandati Apostolici, & ipsius Monasterii jacturam, quod iidem Abbas, & Monachi hac de Causa sumptibus atterunt, & debitoribus oneribus opprimunt, prorogatur. Quocirca discretioni tuæ per Apostolica scripta præcipiendo mandamus, quatenus eorum cavillationibus, & tergiversationibus non indulgens, si ex dictis receptorum Testium, fama, aliisque adminiculis deformationem ejusdem Monasterii deprehenderis; & ex qualitate personarum ejusdem attendens illud ex eisdem personis non posse de facili reformari; ad concedendum ipsum cum juribus, & possessionibus suis Abbatissæ, & Conventui præfatis juxta priorum continentiam litterarum absque solemnitate tamen, & strepitu judiciarii ordinis, & inducendum eas, vel partem earum in corporalem possessionem eorum, & defendendum inductas; invocato ad hoc, si opus fuerit, auxilio brachii sæcularis; submoto cujusvis more, ac difficultatis dispendio, oppositione remota, procecedas; Contradictores per censuram Ecclesiasticam, appellatione postposita, compescendo. Cæterum ne idem Monasterium iterum dilapidari contingat, ubi expedire videris, publicæ prohibitionis proponas Edictum; ne quis ab eisdem Abbate, & Monachis sub quovis alienationis, vel obligationis titulo præsumat accipere bona Monasterii memorati; & decernas, quod si secus attentatum fuerit, non tenere. Non obstantibus aliquibus litteris veritati, & justitiæ præjudicantibus, a Sede Apostolica impetratis, vel etiam impetrandise.

Datum Anagniæ ii. Kalendas Octobris, Pontificatus Nostri Anno Secundo.