« bullarium-franciscanum-911 »

INNOCENTIUS &c.

Dilectis Filiis Ministro a , Custodibus, vel eorum Vicariis Ordinis Fratrum Minorum Marchiæ Anconitanæ Salutem, & Apostolicam Benedictionem.

Tunc potissime Conditori omnium acceptabile obsequium exhibetur, cum pro conservatione Fidei Catholicæ, cujus est ipse perpetuum, ac stabile fundamentum, præcipua intentione servitur. Digne itaque in hoc sibi providimus studiosum, ac placidum rependere famulatum, & præcipue in quibusdam Ecclesiæ Romanæ Terris propter ipsarum vicinitatem vigilare instantius, & validius satagere contra diros hostes ejusdem Fidei; ut cultura salubris per Nos impensa vicinis agris Dominicis utilis sit longinquis, & semen verbi Divini fusum in proximum fructificet etiam in remotis. Licet Apostolica Sedes tales hostes ubique indefessa sollicitudine persequatur; nec unquam ab hoc exercitio cessaverit cura ejus. Hinc est, quod devotioni vestræ per Apostolica Scripta districte præcipiendo mandamus, in remissionem vobis peccaminum injungentes, quatenus per vos, & Fratres vestri Ordinis vestræ curæ commissos, quos ad hoc videritis oportunos, contra hæreticos infra terminos Provinciæ tuæ, Fili Minister, curæ commissæ constitutos, prædictis fide diligenti, & efficaci potentia Verbum Crucis prædicare faciatis. Ut autem vobis, ac Fratribus eisdem de prædicatione verbi, & aliis Fidelibus de Cruce propter hoc assumenda desiderabile præmium producatur, vobis, ac eisdem Fidelibus illam indulgentiam, idemque privilegium elargimur, quæ transeuntibus ad Terræ Sanctæ subsidium in Generali Conciliob conceduntur. Ceterum, ut salutis tantæ negotium possit facilius, & efficacius promoveri; vobis, ac Fratribus eisdem concedimus, quod illis ex Fidelibus memoratis, qui vestræ prædicationi, cum per vos Verbum Crucis hujusmodi proponatur, adfuerint, quadraginta dies de injuncta sibi pœnitentia relaxamus; & omnibus hujusmodi Crucem sumentibus, qui pro incendiis, aut Ecclesiarum fracturis, seu pro injectione manuum in Clericos, vel alias Religiosas personas Ecclesiasticas Censuras incurrerint; possitis absolutionis beneficium juxta formam Ecclesiæ impertiri: Proviso quod damna passis, & injurias satisfaciant competenter; illis tamen exceptis, quorum excessus adeò sunt difficiles, & enormes, quod sint ad Sedem Apostolicam destinandi.

Datum Laterani vi. Kalend. Aprilis Pontificatus Nostri Anno Undecimo.