Général
-
Innocent IV (1243-1254)
-
Gregorii IX. Decretum favore Abbatis S. Leucii super provisione Ecclesiarum illi subjectarum editum recognoscit, & admittit pro Tudertino Monasterio S. Mariæ Montis Sancti. (Ex Authographo in Archivo dicti Monasterii nunc S. Francisci appellati affervato sub plumbo.)
-
Anno 1252. die 8. Octobris.
-
1252
-
INNOCENTIUS &c.
Dilectis in Christo filiabus … Abbatissæ, & Sororibus Monasterii S. Mariæ Montis Sancti a Ordinis S. Damiani Salutem, & Apostolicam Benedictionem.
Litteras felicis recordationis Gregorii PP. b prædecessoris nostri super quadam inhibitione, & concessione facta quondam .... Abbati S. Leucii Tudertin., quas vobis ad vestrorum conservationem jurium opportunasc asseritis, diligenter vidimus; & earum tenorem Venerabilis Fratris Nostrid … Ostien. & Velletren. Episcopi precibus inclinati sub Bulla nostra de verbo ad verbum annotari fecimus, qui est talis.
“Gregorius Episcopus Servus Servorum Dei, dilectis filiis … Abbati & Conventui S. Leucii Tudertin. Præmonstraten. Ordinis Salutem, & Apostolicam Benedictionem. Tanto libentius petitionibus vestris, præsertim quæ a rationis tramite non discordant, assensum favorabilem impertimur; quanto propensius in Religionis, & honestatis vestræ fragrantia delectamur. Ex parte siquidem vestra fuit nobis humiliter supplicatum, ut cum, sicut asseritis, in Prioratibus, & Ecclesiis Monasterio vestro subjectis nullus recipi debeat, nec etiam consueverit absque assensu vestro in Priorem, Clericum, vel Oblatum; & in quibusdam ex ipsis vobis irrequisitis nonnulli temere sint recepti, super hoc providere vobis, & eidem Monasterio paterna sollicitudine dignaremur. Nos igitur vestris supplicationibus inclinati auctoritate præsentium districtius inhibemus, ne quisquam in Prioratibus, & Ecclesiis memoratis, in quibus consensus vester est necessario requirendus, sine assensu vestro de cetero admittatur, vobis nihilominus indulgentes, ut tam in illos, qui contra dictam prohibitionem aliquos in eisdem Prioratibus, & Ecclesiis recipere præsumpserint, quam receptos possitis, prout ad vos de jure pertinet, censuram Ecclesiasticam exercere. Nulli ergo omnino hominum liceat hanc paginam nostræ inhibitionis, & concessionis infringere &c. Dat. Reate xiiii. Kal. Octobr. Pontificatus Nostri Anno Quinto.
Volumus autem per annotationem hujusmodi nullum acquiri vobis jus novum, sed conservari dumtaxat antiquum.
Dat. Perusii viii. Idus Octobr. Pontificatus Nostri Anno Decimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CDXXXVII., p.630
-
(a) Montis Sancti Tudertinæ Diœcesis, ut ex contextu epistolæ, & aliis; de quo Monasterio actum est supra non semel.
-
(b) Gregorii PP.: Hujus nominis IX.
-
(c) Jurium opportunas: Nam Ecclesiæ, & possessiones Monasterii S. Leucii Præmonstraten. Ord. Tudert. collatæ fuerunt Monialibus Montis Sancti a Gregorio IX., ut visum est supra.
-
(d) Fratris nostri …: Raynaldi de Comitibus Signinis, qui paulo post Alexander IV. fuit.