« bullarium-franciscanum-800 »

INNOCENTIUS &c.

Venerabilibus Fratribus a … Archiepiscopo Mediolanensi, & ejus Suffraganeis b , ac universis aliis Ecclesiarum Prælatis, & Clericis, necnon & ceteris Christifidelibus per Mediolanensem Provinciam constitutis Salutem, & Apostolicam Benedictionem.

Pridem eo Bullæ nostræ confracto typarioc, quo Apostolorum Petri, & Pauli capita signabantur, aliud utcumque consimile fecimus continuò subrogari; ne ob Bullæ defectum personis, & negotiis ex vacatione dispendium immineret. Porrò, quia subrogatum hujusmodi corpulentiores solito eorumdem capitum effigies exprimebat, ac per hoc discrepabat notabiliter a priori; aliud postmodum, cujus impressione præsentes litteræ muniuntur, aptius in opus bullandi perpetuum, reposito in otium altero, fecimus per manum alterius Opificis fabricari, donec corruptione, seu vetustate defecerit, non mutandum. Verum quia falsariorum perniciosa subtilitas, si parum vigilet cauta prudentia, ex adverso ex mutatione prædicta præsumet fortasse materiam moliendi sibi nova suæ nequitiæ instrumenta; perspicaciori est considerationis oculo providendum, ut si lætalis sibi ipsi, & toti corpori suo manus falsis incudibus simile quidquam effigiare tentaverit, intra pestilentes proprii latibuli officinas id per transumptum de veris exemplaribus speciem fallere nequeat oculos inspectoris arguti; nec evadere ad communis utilitatis incommodum severi Judicis ultionem. Quocirca mandamus, quatenus contra litterarum nostrarum falsarios manus sollicitæ indaginis extendentes iniquitates ipsorum satagatis ad perfectum odium invenire; ita quod hujusmodi radix, quæ per suffragia maligni temporis pullulavit, disciplinariis falsis acumine succidatur. Cum autem aliquibus vestrum Apostolicas litteras contigerit præsentari, circa præsentantis personam, maximè si privilegium, vel litteras super concessionibus, vel indulgentiis, aut aliis negotiis, quæ a Nobis non nisi de certa conscientia conceduntur, vel etiam committuntur, obtulerit; diligens consideratio habeatur, utrum ex illius opinione, vel meritis aliquis in ejus actionibus sinistræ suspicionis scrupulus oriatur. Deinde qui litteras hujusmodi recipit, eas in Bulla, filo, charta, stilo dictaminis, Scripturæ forma d, & aliis, in quibus notari, vel deprehendi falsitas potest, circumspiciat diligentere; & si certum in illis falsitatis apparuerit argumentum, reprobentur protinus tamquam falsæ; & contra impetratores earum, vel scienter utentes eisdem ad incarcerationem, & alias pœnas juxta rigorem Canonumf procedat exacta diligentia Prælatorum. Contradictores, & rebelles per censuram Ecclesiasticam appellatione postposita, compescendo, si & ipsi voluerint canonicam effugere disciplinam. Proviso, ut litteris nostris ea Bulla, quam subrogavimus priori confractæ, signatis nullatenus derogetur ita tamen, quod si super earumdem litterarum aliquibus de veritate Bullæ contigerit rationabiliter dubitari, per subtilem collationem aliarum similium, de quibus non dubitatur, ad illam hujusmodi hæsitatio sine difficultate qualibet dirimaturg. Ut autem aliquibus super hoc de culpa, vel negligentia in petendis nullum frivolæ defensionis, vel excusationis pallium relinquatur; volumus, & districtè præcipimus, ut singuli Prælatorum subditos suos proposito eis publicæ commonitionis edicto præmuniant, & informent, quod litteras Apostolicas, quibus uti disponunt, & quas de aliorum, quam Nostris, vel illorum, qui ad illud deputati noscuntur officium, manibus receperunt, apud se ipsos adhibito, si opus fuerit, peritorum consilio discutiant diligenter; & eas tunc in publicum proferant, cum discreto fuerint judicio approbatæ. Si verò eas intellexerint reprobas, illas statim destruant, vel resignent; quia si postquam eis publicè uti cœperint, ipsas contigerit argui falsitatis; sciant sibi seram ignorantiam, si tunc eam prætenderint, quominus canonicæ pœnæ subjaceant, nullatenus profuturam.

Datum Perusii x. Kal. Septembris Pontificatus Nostri Anno Decimo.