« bullarium-franciscanum-614 »

INNOCENTIUS &c.

Dilectis filiis Ministro a & Fratribus Ordinis Fratrum Minorum Pampilonen. b Salutem, & Apostolicam Benedictionem.

Plantatus olim in agro Ecclesiæ videturc Ordo sic a suis primordiis, gratia operante divina, laudabilibus incrementis successivè profecit, quod assiduè flores proferens copiosiùs honestatis, & producens liberius fructus vitæ, inter alia plantaria Dominica puritate conversationis, scientiæ dono, & virtutis merito dignoscitur specialiter insignitus. Unde Nos in agro ipso Cultores licèt immeriti a Domino deputati eumdem Ordinem grandi prosequi favore proponimus, & exaltationem ipsius jugis diligentiæ studio multipliciter procurare; ut Apostolicæ gratiæ rore continuè irroratus, majoribus semper Deo tribuente consurgat; & dilatetur augmentis. Hinc est, quod cum inter vos ex parte una, & Venerabilem Fratrem nostrum Episcopumd, ac dilectos filios Capitulum Pampilonense ex altera super quibusdam articulis materia fuerit dissentionis exortae; & dilectus filius noster H.f tituli Sanctæ Sabinæ Presbyter Cardinalis de nostro beneplacito, & mandato inter vos, & eosdem Episcopum, & Capitulum amicabiliter duxerit componendum: Nos vestris supplicationibus inclinati, cupientes vestræ providere quieti, ut pacis auctori possitis devotius famulari, compositionem hujusmodi auctoritate Apostolica confirmantes, & ejusdem defectum Capituli, cum ipsius non fuerit in eadem compositione requisitus assensus, supplentes de plenitudine potestatis, eadem auctoritate statuimus in virtute obedientiæ, tenore præsentium districtiùs injungendo, ut prætacta compositio perpetuis temporibus hinc indè inviolabiliter observetur; Decernentes irritum, & inane quidquid contra compositionem eamdem per quamcumque partium inposterum contigerit attentari. Tenorem autem hujus compositionis ipsius de verbo ad verbum præsentibus inseri fecimus, qui talis est:

“Universis præsentes litteras inspecturis Frater H. Divina miseratione tituli Sanctæ Sabinæ Presbyter Cardinalis salutem in Domino sempiternam. Orta olim, faciente humani generis inimico, inter Venerabilem Patrem Episcopum, & Capitulum Pampilonense ex parte una, & dilectos in Christo filios Ministrum, & Fratres Minores loci ejusdem ex altera materia quæstionis super eo, quod dicti Fratres de loco S. Petri de Ripis, in quo hactenus morabantur, ad locum extra portam Sancti Laurentii Pampilonen., in quo nunc ipsi Fratres morantur, auctoritate Apostolica se transtulerint: Episcopo, & Capitulo prædictis asserentibus, hoc in suum præjudicium redundare. Cum Dominus Papa super eodem negotio Venerabili Patri Tarraconensi Archiepiscopo, & Cæsaraugustano Episcopo conservationemg Fratrum contra malefactores, molestatores, & invasores, ac rebelles litteris Apostolicis duxerit committendam; prout in ipsius litteris Apostolicis plenius continetur; tandem nondum sopita discordia, ad Dominum Papam denuò quærimonia est delata, qui volens finem imponi litibus, & partium providere quieti, præsentibus memoratis Episcopo, & Fratribus Nobis viva voce commisit, ut inter eos compositionem amicabilem faceremus; remanentibus in suo robore litteris ejusdem Fratribus super ipso negotio a Sede Apostolica concessis. Nos verò hujusmodi mandato recepto, de consensu Episcopi, & Fratrum taliter ordinamus; quod Episcopus, & Capitulum Pampilonen. prætactos Fratres familiares amicos, & benefactores eorum ad gratiam, & bonam voluntatem suam admittant, qui videbantur occasione istius discordiæ destituti; & dimittant eis omnem rancorem, malevolentiam, & offensam; & non gravent eos, nec causam quærant aliquam de cetero occasione hujusmodi aggravandi. Volumus etiam, quod dictus Episcopus eosdem Fratres per suas patentes litteras recomendet Clero, & Populo Civitatis Pampilonensis, & Diœcesis universæ, significans per easdem, quod eos, & nominatos benefactores, amicos, & familiares eorum ad pacem, & gratiam suam admisit, & benevolentiam, & amorem. Item volumus, & mandamus, quod in jam dicto loco novo extra portam Sancti Laurentii Pampilonen., qui ipsis Fratribus a Sede Apostolica est concessus, prætacti Episcopus, & Capitulum permittant, eosdem Fratres remanere liberè, pacificè, & quietè; & construere ibidem Ecclesiam, & alia ædificia eorum usibus oppotuna. Præterea cum dicti Fratres occasione istius discordiæ tam in libris, quam in aliis rebus damna non modica, sicut asserunt, sint perpessi; mandamus, ut prætactus Episcopus omnia ablata Fratribus restitui plenariè faciat; & sententiam excommunicationis generaliter proferat in omnes illos, qui res Fratrum asportaverunt, vel detinent; vel destruxerunt; vel consilium, seu auxilium, ut hæc fierent, impenderunt; donec Fratribus plenariè fuerit satisfactum; etiam omnes illos excommunicationi subjiciant, qui sciunt, ubi res Fratrum detinentur; nisi quam citiùs commodè potuerint, Fratribus curaverint revelare; & has sententias faciat Episcopus per Civitatem, & Diœcesim Pampilonensem in magnis festivitatibus, & in generalibus prædicationibus, & in Confratriis etiam publicari; quousque Fratres suas res recuperaverint universas. Item volumus, & mandamus, quod si qua de bonis propriis amicis, & benefactoribus, seu familiaribus Fratrum, tam in communi, quam in speciali occasione hujusmodi ablata fuere, prætactus Episcopus restitui plenariè faciat & illis, in detentores ipsos similem sententiam proferendo. Ad hæc mortui, qui occasione istius discordiæ insepulti tenentur, omni occasione, dilatione, & contradictione sepofitis, per suos Sacerdotes Parochiales tradentur Ecclesiasticæ sepulturæ. Præterea si quas pœnas spirituales, seu temporales præfati Episcopus, & Capitulum alicui de familiaribus, benefactoribus, seu amicis ipsorum Fratrum occasione istius discordiæ indixerunt remittant easdem; & illos ad pœnas illas volumus non teneri. Item volumus, & mandamus, quod ipsi Fratres ab Episcopo, & Capitulo sæpedictis veniam postulent humiliter supplicantes, ut si quis de Fratribus, vel de amicis ipsorum eos in aliquo offenderunt, ei remittant; & Episcopus, & Capitulum liberaliter annuant postulatis; & offensam, si qua fuerit, remittentes: similiter Fratres remittant eis omnem rancorem, malevolentiam, & injuriam corporalem; & procurent bona fide, quantum in ipsis est, quod familiares, amici, & benefactores eorum similiter remittant eis omnem rancorem, malevolentiam, injuriam, & offensam. Et cum occasione istius discordiæ in prætactos Fratres, & eorum familiares, amicos, & benefactores per eumdem Episcopum, & Canonicos, & alios auctoritate ipsorum, & per Venerabilem Patrem Tarraconensem Archiepiscopum, & Cæsaraugustanum Episcopum, & alios auctoritate ipsorum in eosdem Canonicos, & alios dicantur excommunicationum plurimæ sententiæ promulgatæ, & propter bonum pacis, & caritatem inter eos omnimodè conservandam; & ne occasione ipsarum sententiarum in quoscumque prætextu hujus negotii prolatarum inter ipsos contingat inposterum, quod absit, aliquam materiam discordiæ suboriri; Nos omnes sententias excommunicationum, suspensionum, seu etiam interdicti quocumque tempore per dictum Episcopum, & Canonicos, seu per quoscumque alios ipsorum auctoritate latas in Fratres, & eorum familiares, amicos, & benefactores, si quæ fuerint, quacunque de causa, seu etiam in jam dictos Canonicos Pampilonen. per memoratos Archiepiscopum, & Cæsaraugustanum Episcopum, seu per quoscumque alios auctoritate ipsorum, & in quascumque personas alias, cujuscumque conditionis existant, per quoscumque istius discordiæ occasione prolatas ad cautelam de speciali mandato Domini Papæ, quod super hoc recepimus, relaxamus. In cujus rei testimonium, & evidentiam pleniorem præsens scriptum sigilli nostri fecimus munimine roborari. Datum in Castro S. Andreæ juxta Lugdunum xvi Kalendas Septembris Pontificatus Domini Innoc. Papæ IV. Anno Quintoh.”

Nulli ergo omnino hominum liceat hanc paginam nostræ confirmationis, suppletionis, & constitutionis infringere, vel ei ausu temerario contraire. Si quis autem &c.

Datum Lugduni iv. Nonas Septembris Pontificatus Nostri Anno Quinto.