Général
-
Innocent IV (1243-1254)
-
Mandat Fratribus Minoribus, ne recipiant ad Ordinem Fratres Ordinis Prædicatorum, nisi &c., neque Novitios ante probationis annum ad professionem admittant, aut eis libertatem adimant. (
Regest. Vatican.epist. 741., apud Waddingum in Regesto Pontif. num. 15., & Rodericum inBullarioRegul. tom. 1. Bul. 3., necnonAuthographumin Archivo Conventus S. Francisci Constantiæ in Svevia, & Avenione lib. 1. Bul. pag. 2.) -
Anno 1244. die 24. Junii.
-
1244
-
INNOCENTIUS &c.
Dilectis filiis Generali Ministro a , & Fratribus Ordinis Fratrum Minorum Salutem, & Apostolicam Benedictionem.
Meminimus, vobis olim in virtute obedientiæ per nostras litterasb præcepisse, ut Fratres Prædicatores, & eorum Ordini voto, & juramento etiam obligatos nullatenus de cetero, prætextu indulgentiæ alicujus, seu aliquarum litterarum obtentarum a Sede Apostolica, vel etiam obtinendarum imposterum, quæ de hoc expressam non facerent mentionem, præsumeretis recipere; nisi prius Prioris sui petita foret licentia, & obtenta. Decernimus etiam irritum, & inane quidquid vos in hac parte contra præceptum nostrum contingeret attentari; statuentes, ut hujusmodi præsumptores incurrerent excommunicationis sententiam ipso facto, a qua nequaquam absolvi possint, nisi se apud Sedem Apostolicam ab ea, sicut justum foret, absolvendi personaliter præsentarent. Verum quia postmodum per quasdam alias litterasc vobis, & eisdem Fratribusd districtiùs duximus inhibendum, ne ante annum probationis elapsum, qui est maximè in subsidium fragilitatis humanæ regulariter institutus; quemquam ad professionem vestrorum Ordinum præsumeretis recipere; seu ad renuntiationem seculi faciendam; nec constitutum in probatione Novitium aliquatenus impedire, quominus infra eumdem annum probationis ad aliam Religionem, quam mallet, transiret, sicut de sua procederet, libera voluntate; non obstantibus Statuto contrario; si quod a vobis esset editum, quod irritum decrevimus, & inane; vel aliquibus litteris a Sede Apostolica impetratis, seu etiam impetrandis, quæ de præmissis expressam non facerent mentionem; & si fortè contra hujusmodi nostram prohibitionem quemquam vos, vel dicti Fratrese reciperetis; qui taliter receptus existeret, nullatenus vestro esset, nec eorumdem Fratrum Ordini alligatus; vosque, ac ipsi a receptione quorumlibet ad professionem dictorum Ordinum essetis ipso facto suspensi; & insuper pœnæ deberetis subiici, quæ Fratribus ipsorum Ordinum pro culpis infligi gravioribus consuevit. Nos, quod de obligatis Ordini prætactorum Fratrum in præmissis nostris duximus litteris, ne ipsos recipere præsumatis; statuendo, ut hujusmodi præsumptores ipso facto sententiam excommunicationis incurrant; de illis tantum intelligi volumus, quos post prætactum annum probationis elapsum eorum esse constiterit Ordini alligatos. Nulli ergo omnino hominum liceat hanc paginam nostræ confirmationis infringere, vel ei ausu &c.
Datum apud Civitatem Castellanam viii. Kalendas Julii Pontificatus Nostri Anno Primof.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°LIII., p.346
-
(a) Ministro: Haymoni Anglo, de quo supra in aliis epistolis.
-
(b) Litteras: Anno isto die 21. Aprilis incip.
Quo vos in Christorelatas. -
(c) Litteras; Quæ sicut & illæ Gregorii IX.
Non solum in favorem &c.1236. datæ sunt hoc anno die 17. Junii, ut supra. -
(d) Fratribus: Nempe Ordinis Prædicatorum.
-
(e) Fratres: Ordinis Prædicatorum.
-
(f) Eadem epistola data est etiam Magistro, & Fratribus Ordinis Prædicat. hoc anno, ac die, iisdemque verbis, mutatis tantum Religionis nominibus, ex Archivo Aracelitano num. 59., & Speculo Minor. in Summ. apud Waddingum in Reges. Pontif. num. 16., & in Bullario novo Ordinis Prædicat. tom. I. Bull. 75. Innocentii IV., unde typographicus error est apud citatum Rodericum habentem
dat. octavo Kalend. Junii; cum hoc anno toto Maji mense Pontifex fuerit Romæ, non apud Civitatem Castellanam ex præcedentibus ejus epistolis.