Général
-
Grégoire IX (1227-1241)
-
Vetat, ne in anno probationis Fratres quemquam ad professionem inducant, recipiantque; aut prohiheant, ne ad aliam Religionem Novitius transeat, aut ad professionem, seculique renunciationem cogant. (Ex
Regesto Vatic.ep. 109., Archivo Aracoelit. n. 38., & 87., ac Waddingo in Regesto Pontif. num. 48.) -
Anno 1236. die 13. Julii.
-
1236
-
GREGORIUS &c.
Dilectis filiis Ministro a Generali, & Fratribus Ordinis Minorum Salutem, & Apostolicam Benedictionem.
Non solum in favorem Conversi, sed etiam Monasterii Probationis tempus a Sanctis Patribus est institutum, ut ille asperitates istius, & istud mores illius valeat experiri: In Regula quoque Beati Benedicti præcipitur, ut ad conversionem noviter venienti non facilis tribuatur ingressus, sed, sicut docet Apostolus, an sit ex Deo Spiritus, comprobetur; & dura, & aspera, per quæ itur ad Dominum, exponantur. Præterea in eadem Regula subjungitur, ut dicatur: Ecce lex, sub qua militare desideras; si eam observare potes, ingredere; alioquin liber venisti, liber discede. Insuper Nos ipsi statuimusb, ut positi in probatione Novitii ante susceptum Religionis habitum, qui dari profitentibus consuevit, seu ante professionem emissam, ad statum pristinum redire possint liberè infra annum; & ad omnem ambiguitatem penitus amovendam, cum in quibusdam locis Religiosis Novitiorum habitus non distinguatur ab habitu Professorum; professionis tempore benedicantur vestes, quæ profitentibus conceduntur, ut Novitiorum, ac Professorum habitus discernatur. Licet igitur zelum animarum habentes, eas lucrari Domino sollicitè cupiatis; quia tamen decet, & expedit, ut conscientiæ puritati non desit judicium rationis, ne unde spiritalis profectus quæritur, inde salutis dispendium subsequatur; præsentium vobis auctoritate districtius inhibemus, ne ad susceptionem vestri Ordinis ante professionem aliquem obligare, vel infra probationis spatium (quod est maximè in subsidium fragilitatis humanæ regulariter institutum) quemquam facto, vel verbo ad profitendum, seu ad renunciandum de necessitate seculo, inducere præsumatis; nec constitutum in probatione Novitium aliquatenus impedire, quominus infra tempus probationis ad aliam Religionem, quam maluerit, transeat; sicut de sua processerit libera voluntate; non obstantibus Statuto contrario, si quod a vobis est editum; quod tamquam in elusionem Constitutionis Nostræ præsumptum, irritum decernimus, & inane; vel aliquibus litteris a Sede Apostolica impetratis. Nulli ergo omnino hominum liceat hanc paginam nostræ inhibitionis, & constitutionis infringere, vel ei ausu temerario contraire. Si quis autem hoc attentare præsumpserit indignationem Omnipotentis Dei, & Beatorum Petri, & Pauli Apostolorum ejus se noverit incursurum.
Datum Reate iii. Idus Juliic Pontificatus Nostri Anno Decimod.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CCIII., pp.198-199
-
(a) Ministro: Fr. Eliæ hoc anno in Comitiis Generalibus Assisii in festo Pentecostes electo iterum ex Waddingo, vel antea, ut alii tradiderunt.
-
(b) Statuimus: Extat. lib. 3. tit. 31.
de Regul, & trans.cap. 23. Statuimus novitios in 6. Decret. -
(c) Rodulphius Hist. Seraph. lib. 2. fol. 167. b. ait hoc decretum editum esse
Interamnæ die2. Novembris Pontif. anno x., quod est hoc anno iteratum: & Scribæ ex Reges. Vatic. annotarunt, ibi haberi epist. hanc datam Interamnæ ii. nonas Junii sub num. 100. -
(d) Innocentius IV. anno sui Pontificatus primo innovavit ex epistola
Meminimus vobis &c.dat. die 24. Junii anno 1244., & die 17. mense eodem temperaverat; Alexander etiam IV. anno 1256. die 5. Maji eamdem inhibitionem inculcavit. Gregoriani decreti meminit antiquus auctor Barthol. Pisanus Conform. 9. in expositione capitis 2. Regulæ Min.