« bullarium-franciscanum-149 »

GREGORIUS &c.

Dilectis filiis … Decano, & Magistro Ekcardo S. Germani, & Thethero S. Trinitatis Spiren. a Canonicis Salutem, & Apostolicam Benedictionem.

Exhibita Nobis Simonis Canonici Ecclesiæ Sanctæ Mariæ Trajecten.b Leodien. diœcesis petitio continebat, quod cum super provisione sua … Præposito ejusdem Ecclesiæ direxerimus Scripta nostra; & … Vallis Dei, ejusque Collegæ, ac postmodum … Wicemburgen.c, ipsiusque Conjudices Abbates ejusdem, & Spiren. diœcesum, quos ei, postquam labores multos, & dispendia pertulit sæpius ad Sedem Apostolicam veniendo, executores deputavimus, eum in Canonicum ipsius Ecclesiæ recipi facientes, de mandato nostro Præbendam d, quæ primo in eadem vacaret Ecclesia, reservari mandarint conferendam eidem; dictus Præpositus in elusionem Mandati Apostolici VV., & S. Clericos in ipsa recipi procuravit in Canonicos, & in Fratres; & ut dictus Simon a prosecutione provisionis suæ desistere cogeretur; quasdam contra eum ad diversos Judices, tam a Sede Apostolica, quam a dilecto filio nostro O.e Sancti Nicolai in Carcere Tulliano Diacono Cardinali tunc in partibus illis Apostolicæ Sedis Legato super dicta Præbenda litteras impetravit; quarum auctoritate ipsum multipliciter aggravat, & molestat. Unde cum idem Simon valde dubitet, ne aliquis prædictorum Judicum processerit contra eum, provideri sibi per Sedem Apostolicam postulavit; & eumdem Præpositum, qui sic malitiose vexavit eumdem, in expensis sibi legitimis condemnari. Nos igitur volentes ejusdem Præpositi obviare versutiis, ac ipsius Clericif providere quieti, eum ab excommunicationibus, si quæ per eosdem Judices latæ sunt, per dilectum Filium Fratrem Rainerium g Pœnitentiarium nostrum absolvi fecimus ad cautelam; per Apostolica vobis Scripta mandantes, quatenus sufficienti ab eo cautione recepta, quod super iis, pro quibus sententias ipsas rationabiliter latas esse constiterit, satisfactionem impendat; absolutum denuntiantes eumdem, & facientes vobis obtentas contra eum litteras, & processus per eas habitos exhiberi; audiatis hinc inde proposita, & si de partium voluntate processerit, causam fine canonico terminetis; facientes, quod statutum fuerit, firmiter observari; alioquin ipsam ad Nos remittatis sufficienter instructam, præfigentes partibus terminum competentem, quo nostro se conspectui repræsentent justam, authore Domino, sententiam recepturæ. Quod si supradictus Clericush super iis, pro quibus eum inveneritis rationabiliter excommunicatione ligatum, satisfacere forte contempserit; ipsum in pristinam excommunicationis sententiam, sublato appellationis obstaculo, reducatis. Contradictores per Censuram Ecclesiasticam appellatione postposita compescendo; nullis litteris, veritati, & justitiæ præjudicium &c. Testes autem, qui fuerint nominati, si se gratia, odio, vel timore subtraxerint, per Censuram Ecclesiasticam cessante appellatione cogatis veritatis testimonium perhibere. Quod si non omnes iis exequendis interesse potueritis, duo vestrum ea nihilominus exequantur; non obstante Constitutione de duabus dietis edita in Concilio generalii, ita quod ultra quartam, vel quintam dietam extra suam Diœcesim pars ad judicium non trahatur.

Datum Laterani vi. Idus Februarii, Pontificatus Nostri Anno Septimo.