Général
-
Grégoire IX (1227-1241)
-
Eisdem de eadem re. (Ex cap. 17. lib. 5. de
excess. Prælat.) -
Anno 1231. die 22. Augusti.
-
1231
-
GREGORIUS &c.a
Nimis prava &c.b Cum quidam viri Religiosi, ut puta Fratres Prædicatores, & Minoresc, quorum Ordinem, & Regulam Sedes Apostolica noscitur approbasse, in arctissima paupertate Christo pauperi famulentur; plerique Prælati, & alii eos ad Synodos suas cogunt accedere, ac suis Constitutionibus subjacere: nec his contenti Capitula, & scrutinia in locis Fratrum pro his corrigendis facturos se comminantur, fidelitatem juramento firmatam ab eorum Ministris, & Custodibus exigentes: eis quoque ut tam extra Civitates, quam intra cum eis processionaliter veniant ex levi causa mandantes: excommunicationis sententiam fulminant in benefactores eorum: & idipsum Fratribus comminantes eos de locis, in quibus Domino famulantur, satagunt amovere, nisi obediant in omnibus supradictis. Ad hæc nè Fratres ad honorabiliores Civitates, & Villas, ubi religiosè, ac honestè valeant commorari, a Populis devotè vocati accedere audeant inhibentes: tam in accedentes Fratres, quam in receptatores eorum præsumunt excommunicationis sententiam promulgare. Ab eis etiam de hortorum fructibus Decimas, nec non de habitaculis Fratrum sicut de Judæorum domibus contendunt redditus extorquere, asserendo quod nisi Fratres morarentur ibidem, ab aliis habitatoribus proventus aliqui solverentur: & ut ipsos suæ subdant totaliter ditioni, eisdem Ministros, & Custodes volunt præficere pro suæ arbitrio voluntatis. Quocirca mandamus, quatenus universi, & singuli a prænotatis gravaminibus desistatis, subditos vestros ab hujusmodi gravius compescendo &c.d
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°LXIV., p.75
-
(a) Gregorius &c.: Data creditur hæc epistola universis Ecclesiarum Prælatis, uti præcedens., cum in supradicta Innocentii IV. decretali gravamina tam in ista, quam in illa exposita recenseantur.
-
(b) Prava &c.: Nulla quidem decretalis epistola occurrit, quæ incipiat: Nimis prava &c. nihilominus ex contextu elicitur simile initium cum superiori proxime relata habere, eandemque expostulationem.
-
(c) Minores: De quibus testatur Cardinalis Ostiensis in
Summatit. de Hæreticis num. 16., ut in præcedenti epist. est ostensum. -
(d) Compescendo &c. Quæ hic omissa sunt a decretalium Gregorii IX. compilatore S. Ravmundo, haberi poterunt & ex commemorata Innocentii epistola consimili, & etiam ex sequenti etsi privata Gregorii die 28. Augusti data Archiepiscopis Coloniensi, & Magdeburgensi, Episcopoque Herbipolensi pro eadem causa. Ceterum præsens epistola videtur data etiam circa tempus præcedentis, & quidem ante diem 28. mensis Augusti; cum in prædicta eo die scripta utriusque epistolæ gravamina recenseantur; testeturque Pontifex se super omnibus illis ad Ecclesiæ Prælatos litteras dedisse. Si quis autem ad has binas decretales plures optaret notas, consulat harumdem expositores præsertim recentes Gonzalez, Pirhing, & Anacletum.