Général
-
Grégoire IX (1227-1241)
-
Jubet, ut Fratres de Pœnitentia exactionibus, publicis officiis, & juramentis nemo gravare possit. (Habetur in
SpeculoMinorum, in Regesto nostro veteri Ms., apud S. Joannem Capistran. in Defensorio tertii Ordinis, apud Antonium de Sillis inter Privilegia ejusdem Ordinis, & Waddingum in Annal. Reges. Pontif. Gregor. num. 1., atque in Firmamentis trium Ordinum par. 2. tract. 1. fol. 11.) -
Anno 1227. die 25. Junii.
-
1227
-
GREGORIUS &c.
Venerabilibus Fratribus Archiepiscopis, & Episcopis per Italiam constitutis Salutem, & Apostolicam Benedictionem.
Nimis patenter patientiæ divinæ probatur abusor, qui ad Dominum converti volentibus obicem interjicit tarditatis; eique inexcusabiliter convincitur adversari, qui conversos ad Dominum Episcoporum auctoritate gestiens eis laqueum injicit captionis, vel persecutionis, vel ipsos molestiis inquietat; tamquam Pharaonis imitatus vestigia, qui corde indurato non nisi plagis percussus filios Israel exire permisit Ægyptum; & egressos tandem sæva tyrannide persequi non cessavit; donec ipse cum suis in aquis validis meruit suffocari; posteris relinquens exemplum, ut ex simili culpa similis deberet formidari vindicta. Sanè ad audientiam bonæ memoriæ Honoriia Prædecessoris nostri noveritis pervenisse, quod nonnulli de partibus nostrisb novissima sua providè memorantes, derelictis sæculi vanitatibus, pœnitentiam in corde contrito, & humiliato spiritu agere in domibus propriis, vel alibic statuere: Et ut retribuentes miseræ filiæ Babylonis retributionem, quam retribuit ipsa eis, promissæ beatitudinis præmium faciliùs, & feliciùs assequantur; castigare corpus proprium, & in servitutem redigere concupiscunt. Sed Potestates, & Rectores Civitatum, vel locorum, in quibus tales Servi Domini degunt, non attendentes, quod nemo militans Deo implicat se negotiis sæcularibus: & sponsa lotos pedes abnuit inquinare; ab eis, ut ipsos sequantur, & exerceantur in armis, juramento extorquere contendunt; & ad recipienda, & exequenda publica officia compellere moliuntur; quin etiam illos, qui ad agendam pœnitentiam secretos petiere recessus, ad propria revocantes ipsis plura onera, & exactiones imponunt; alias inhonorando ipsos, quos tamquam Dei amicos deberent modis omnibus honorare. Quia igitur interest nostra, Dei viros in Religionis proposito confovere, ad exemplar prædicti Prædecessoris nostri Fraternitati vestræ per Apostolica scripta mandamus; quatenus hujusmodi Pœnitentes, (dum tamen onera, in quibus ratione bonorum suorum tenentur, agnoscant) a prænotatis gravaminibus servantes immunes, ipsos eorum occasione, non permittatis in his, vel aliis temerè molestari, quibus possit eorum pium propositum impediri; molestatores per censuram Ecclesiasticam, appellatione postposita, compescentes.
Datum Laterani septimo Kalendas Junii al. Julii, Pontificatus Nostri Anno Primod.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°VII., p.31
-
(a) Honorii: Hujus decretalis exemplar tandem ad nos pervenit ex Tabulario Vatic. jam cusum supra Bull.
viii.Significatum est &c. referens tamen dumtaxat primum gravamen, ut hi Rectores locorum sequantur, & exerceantur in armis cum juramento: unde conjicitur aliud ab Honorio diploma, pro aliis gravaminibus conditum fuisse, quod forsan adhuc latet, vel amissum est. -
(b) Partibus nostris: Nempe Italiæ, al. partibus vestris.
-
(c) vel alibi: Idest in Eremo, & secretis recessibus, ut infra ait Pontifex.
-
(d) Hoc ipsum diploma iterum Gregorius evulgavit die nonis Aprilis Pontif. anno quinto, quod est anno 1231. ex Regest. Vatic. & innovavit Alexander IV. anno 1260. die 2. Maji., & 15. Julii, ut suo loco videbitur. Meminit etiam, confirmavitque Leo X. epist. Exponi nobis nuper &c. Universis Fratribus tertii Ordinis S. Francisci de Pœnitentiæ nuncupatis data die 6. Januarii anno 1514. apud Waddingum ad eum annum. Legitur & in Bullario Ordinis Prædicat. tom. 7., sed sine loco, anno, & die; tribuiturque Gregorio X. Bull. 4.; atque eidem Ordini; utrumque tamen arbitrarium, cum
Fratres de Pœnitentiasine adjecto non alii illis temporibus haberentur, quam Tertii Ordinis S. P. Francisci; in Apologetico enim S. Bonaventuræ qu. 16. adversarii opposuerunt: cur Ordinem illum, qui dicitur de Pœnitentia, quem ipse (S. Franciscus)instituit, non promovetis; ut ubique dilatetur in Ecclesia &c.?& plura alia monumenta etiam infra referenda dilucide rem comprobant, ut ad Bullam Detestanda humani generis &c. dat. die 30. Martii anno 1228. &c.: Nam ad hujus Ordinis discrimen alterde Saccis, vel vulgo Saccorum dicebatur de Pœnitentia Jesu Christi; sed post annum 1250. institutus; alter de Pœnitentia S. Mariæ Magdalenæ ortus est in Germania post an. 1230., sed vide & not. c. ad BullamCum illorum &c.ann. 1224. 1. Decembris editam ab Honorio iii.