« bullarium-franciscanum-24 »

HONORIUS &c.

Venerabili Fratri .... a Archiepiscopo Toletano Salutem, & Apostolicam Benedictionem.

Urgente officii nostri debito, quo sapientibus, & insipientibus, fidelibus, & infidelibus efficimur debitores; dudum Fraternitati tuæ dedimus in mandatisb; ut cum in regno Miramolinic plures Christiani captivi terrore pœnarum, & mortis apostatasse dicantur; quidam etiam pusillanimes in fide nutantes ad præcipitium essent proni; aliquos viros prudentes ex Fratribus Prædicatoribus, & Fratribus Minoribus illuc auctoritate nostra transmitteresd ad convertendum infideles divina gratia præeunte prædicationibus, & exemplis; erigendum collapsos; confortandum dubios; & confirmandum robustos: adjecimus insuper, ut aliquem ex ipsis Fratribus auctoritate Apostolica in Episcopum consecrares, qui Pontificale ibidem officium exerceret, quo fideles illarum partium a tempore, quo non extat memoriae, caruerunt. Unde tu, ut devotus Ecclesiæ filius diligenter mandatum Apostolicum per omnia exequi curavistif; super quo caritatem tuam debita prosequimur gratiarum actione. Verum Fideles regionis illius, ut veridica relatione accepimus, tanto propter hoc tripudio exultarunt, ac si novus eis lucifer illuxisset, multaque spiritualia beneficia per Episcopum, & Fratres prædictos divina favente gratia tam ipsis, quam aliis provenerunt, de quo gaudemus plurimum in Domino, & lætamur. Sane cum Christiani per diversa, & remota loca illius Regni, quod vastæ amplitudinis esse describitur, ubique dispersi non possint ab uno Episcopo, & paucis Fratribus visitari, præsertim propter feritatem gentis illius, quæ crudelitate nimia persequitur christiani nominis professores; & Fratres etiam inter hostes, & rabies sævientium discurrentes Sacerdotalia indumenta, & vasa ministerio divino dicata secum deferre non valeant absque mortis discrimine manifesto; inevitabilis necessitatis articulus instanter exposcit in hoc negotio abundantius provideri. Quo circa fraternitati tuæ per Apostolica scripta præcipiendo mandamus, quatenus Fratres utriusque Ordinis providos, & discretos zelatores animarum, & in Christi nominis confessione constantes, quotiens opus fuerit, & expedierit, ad illam Provinciam pro tam necessario, & excellenti opere destinare procures: & si, ut nobis suggeritur, pernecessarium esse cognoveris, & expediens, unum vel duos ex ipsis magis eruditos in lege Domini, & in Christi dilectione ferventes in Episcopos consecrareg, ac ad diversa loca illarum partium ad evangelizandum, & Pontificale officium exercendum in susceptæ paupertatis humilitate dirigere poteris; prout fuerit opportunum, dans ipsis consilia salubria, & salutis monita, quomodo caute apud illos ambulare studeant, qui sunt foris, non quasi insipientes, indiscreti, & præcipites; sed ut sapientes, providi, & maturi tempus, ut expedierit, redimentes omnibus omnia facti secundum Apostoli magisterium, ut Christo multos lucrifaciant; & copiosæ messis abundantiam inferant horreis dominicis, mercedis immensitatem pro laboris magnitudine postmodum recepturi.

Datum Laterani x. Kal. Mart. Anno Decimo.