« bullarium-franciscanum-12 »

HONORIUS &c.

Dilectis in Christo filiabus ‥ Abbatissæ, ac Monialibus Monasterii S. Mariæ extra portam de Camullia a juxta stratam Romæam salutem, & Apostolicam Benedictionem.

Sacrosancta Romana Ecclesia devotos, & humiles ex assueto pietatis officio propensius diligere consuevit; & ne pravorum hominum molestiis agitentur, eos tamquam pia mater suæ protectionis munimine confovere. Sanè cum Venerabilis Frater Nosterb ‥ Episcopus Ostiensis, dum in partibus vestris Legationis officio fungeretur, a Capitulo Senensi Cappellam Sanctæ Petronillæc cum Hospitali, & a Vitali de Donicatod Cive Senensi fundum quemdam situm extra portam Senensem de Camullia cum possessionibuse, & omnibus pertinentiis suis in jus & proprietatem Ecclesiæ Romanæ; prout mandaveramus eidemf, nostro nomine recepisset; & in Monasterio ibi constructo quædam in vestræ Religionis augmentum, & favorem vestri Ordinis duxerit statuendag. Nos vestris justis postulationibus annuentes, quod ab eodem Episcopo factum est, gratum habentes & ratum, facta obtentu Religionis vestræ ab Episcopo præfato statuta, sicut in ipsius Privilegio continetur, auctoritate Apostolica confirmamus, & præsentis scripti privilegio communimus. Tenorem autem ejusdem Privilegii ad majorem vestram, & Monasterii memorati cautelam præsentibus litteris duximus adnotandum, qui talis est: Hugo miseratione divina Ostiensis, & Velletrensis Episcopus Apostolicæ Sedis Legatus dilectis in Christo filiabus … Abbatissæ Monasterii Sanctæ Mariæ extra portam Senensem de Camullia juxta stratam Romæam, ejusque Sororibus tam præsentibus, quam futuris Religiosam vitam professis in perpetuum. Prudentibus Virginibus, quæ sub habitu Religionis accensis lampadibus per opera sanctitatis jugiter se præparant obviam Sponso ire, & cum ipso ad cœlestes nuptias introire; nostrum debemus præsidium impertiri; ne forte cujuslibet temeritatis incursus vel eas a proposito revocet; aut robur, quod absit, Sacræ Religionis infringat. Ea propter, dilectæ in Domino filiæ, vestris justis postulationibus grato concurrentes assensu Cappellam Sanctæ Petronillæ cum Hospitali a Capitulo Senensi de assensu Episcopi Senensis, & fundum quemdam, situm extra portam Senensem de Camullia cum possessionibus & omnibus pertinentiis suis a Vitali de Donicato Cive Senensi Nobis nomine Romanæ Ecclesiæ pia liberalitate collata in jus & proprietatem Beati Petri, & Ecclesiæ Romanæ suscepimus, ubi Monasterium ad honorem Dei, & Virginis Gloriosæ Genitricis ejus, ut vos offerretis ibi Domino Holocaustum, & alias exemplo vestro ad divinum obsequium traheretis, nomine Romanæ Ecclesiæ, quod ad ipsam nullo medio pertinet, duximus construendum. Verum quia petistis a Nobis, ut locum ipsum, & personas inibi Domino famulantes contra malignorum incursus protectionis Sedis Apostolicæ privilegio muniremus; Nos vestris justis precibus inclinati, dictum Monasterium, quod ad Romanam Ecclesiam nullo pertinet mediante, in quo divino estis obsequio mancipatæ, cum personis, & omnibus rebus suis sub Beati Petri protectione suscipimus, & præsentis scripti privilegio communimus. Formulam nihilominus vitæ vestræ, quam a Nobis humiliter recepistis, cum Beati Benedicti Regula, perpetuis temporibus manere decernimus illibatam. Locum vestrum cum omnibus pertinentiis suis, & omnia, quæ juste & canonice possidetis, vobis, & per vos iis, quæ vobis canonice successerint, confirmantes. A præstatione vero Decimarum Clausuræ vestræ, & de hortorum fructibus, & pomorum vos esse decernimus auctoritate paginæ præsentis immunes. Pro iis autem, & in aliis, in quibus Ecclesia vestra lege Diœcesana forsan Senen. Ecclesiæ teneretur, unam libram ceræ tantum, & non aliud in Festo Assumptionis Gloriosæ Virginis de Augusto Senensi Episcopo annis singulis persolvetis; nec liceat aliis personis ingredi Claustrum vestrum præter illas, de quibus licentiam habueritis specialem. Electio quoque Abbatissæ vestræ Romano Pontifici, vel Legato ab ejus latere destinato, aut ei, cui Pontifex Romanus injunxerit, præsentetur; a quo electæ confirmationis, & benedictionis gratia impendatur. Correctiones insuper tam capitis, quam membrorum super omnibus, quæ in vestra Ecclesia fuerint corrigenda, soli Romano Pontifici, vel ei, quem ad hoc ipse deputaverit, reservamus. Prohibemus igitur, ne quis Episcopus, vel quælibet alia Ecclesiastica, Secularisve persona libertates vestras infringere; aut obtentu consuetudinis, vel alio modo quisquam a vobis audeat extorquere. Specialiter autem inhibemus, ne usurarios, excommunicatos, aut hæreticos, vel de hæresi infamatos, & nominatim a Senensi Ecclesia interdictos præsumatis in vita, vel in morte quomodolibet recipere ad divina; nec liceat vobis sepulturam habere, nisi pro vobis, & aliis personis, quæ ad vestrum fuerint servitium deputatæ. Ad indicium autem hujus perceptæ a Sede Apostolica libertatis aureum unum h persolvetis Romano Pontifici annuatim. Datum Perusii apud Monasterium Sancti Petri iv. Kalendas Augusti Anno Domini mccxviiii. Indictione vii. Pontificatus verò Domni Honorii Papæ iii. Anno Quarto i. Nulli ergo omnino hominum liceat hanc paginam nostræ confirmationis infringere, vel ei ausu temerario contraire. Si quis autem hoc attentare præsumpserit, indignationem Omnipotentis Dei, & Beatorum Petri & Pauli Apostolorum ejus se noverit incursurum.

Datum Laterani xiii. Kalendas Octobris, Pontificatus Nostri Anno Septimo.