Général
-
Honorius III (1216-1227)
-
Ne Præpositum quemdam injuste traductum molestet, aut ab aliis molestari permittat (Ex Regesto secretioris
Archivi VaticaniEpist. 239. an.v.) -
Anno 1220. die 9. Decembris.
-
1220
-
HONORIUS &c.
Dilecto Filio J. a Tit. S. Praxedis Presbytero Cardinali Apostolicæ Sedis Legato salutem, & Apostolicam Benedictionem.
Constitutus in præsentia nostra dilectus filius Joannes Præpositus Ecclesiæ Sanctorum Apostolorum Constantinopolitanæ exposuit humiliter coram Nobis, quod, cum ad suggestionem quorumdam æmulorum suorum, qui eum odio persequentes iniquo falso se dicebant audisse, quod Monachus fuerat, & Ordinem Fratrum Minorum se voverat suscepturum; eumdem, nullo accusatore penitus comparente, super prædictis, & aliis sibi objectis paratum legitime se purgare, ad suscipiendam Religionem compellere, ac in eadem Ecclesia, in qua spiritualia sibi, & temporalia per bonæ memoriæ ....b Constantinopolitanum Patriarcham de sui assensu Capituli sunt commissa, Decanum instituere in ejus, & Ecclesiæ prædictæ velles præjudicium, & gravamen: idem Præpositus sentiens se, ac Ecclesiam ipsam, quæ propter tenuitatem reddituum duas dignitatesc nequit habere, super hiis injuste gravari ad Sedem Apostolicam appellavit, cujus appellationi humiliter detulisti. Cumque postmodum te mittente quasdam ad nos litteras contra eum, ipse de sibi objectis in nostra vellet præsentia legitime se purgare; Nos tibi, quantum cum Deo potuimus, deferre volentes ei, & dilectis filiis … & …d Nuntiis tuis dilectum filium Armannum Cappellanum nostrume concessimus Auditorem; coram quo eisdem Nuntiis proponentibus, quod nihil eidem Præposito volebant objicere; ac dilecto filio Fratre Luca Magistrof Fratrum Minorum de partibus Romaniæg, in cujus vovisse manibus idem Præpositus dicebaturh, coram nobisi omni contra eum liti cedente; prædictus Præpositus nobis humiliter supplicavit, ut ejus compatientes laboribus, & expensis sibi super hiis providere misericorditer dignaremur: Nos igitur provide attendentes, quod indignum est aliquem sine culpa puniri; discretioni tuæ, de qua plene confidimus, per Apostolica Scripta mandamus, quatenus revocato in statum pristinum, quicquid post hujusmodi appellationem, & iter arreptum ad Sedem Apostolicam veniendi fuerit in ejus præjudicium innovatum; prædictum Præpositum super hujusmodi de cetero non molestes; nec permittas, quantum in te fuerit, ab aliis molestari.
Datum Laterani v. Idus Decembris, Pontificatus Nostri Anno Quinto.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°VI., p.7
-
(a) J.: Joanni Columnæ Romano ab Honorio
iii.anno 1216. S. R. E. Cardinalium Collegio aggregato, annoque sequenti in Orientem, & Constantinopolim Sedis Apostolicæ Legato, de cujus gestis, variaque fortuna Ciacconius, & Oldoinus in Cardinalibus, atque Raynaldus in Annal. Eccles. agunt. -
(b) Bonæ memoriæ: Everardum natione Gallum anno circiter 1217. a capta per Latinos Constantinopoli secundum illius urbis ex Latinis Patriarcham constitutum, cui anno 1220. defuncto successor datus est Matthæus Venetus ex cit. Annal. Eccles. ad ann. 1217. & 1220. n. 59.
-
(c) Duas dignitates: Nempe
Præposituram, & Decanatum. -
(d) Filiis … et…: Petro Arnulfo, & Warnero; ut in sequenti Epistola ad Patriarcham Constantinopolitanum.
-
(e) Cappellanum nostrum: Et paulo post
Electum Clusinum, ut in supracitata sequenti Epistola. -
(f) Fr. Luca Magistro: Leg.
Ministrojuxta FF. Minorum Regulam illis præsertim temporibus. -
(g) De partibus Romaniæ: Id est
Græciæ, quo anno præcedenti a S. P. Francisco post generalia comitia missus fuerat B. Benedictus Aretinus utiMinisterex Waddingo ad eum annum num. 32. & 33. -
(h) In cujus vovisse manibus idem Præpositus dicebatur: Erat igitur tunc Fr. Lucas Minister Provinciæ
Romaniæ; nam ex cap. 2. Regulæ Fratrum Minorum habetur:Si qui voluerint hanc vitam accipere, & venerint ad Fratres nostros; mittant eos ad suos Ministros Provinciales, quibus solummodo, & non aliis recipiendi Fratres licentia concedatur. -
(i) Coram nobis: Expleto Ministerio Provinciæ
Romaniæanno superiori, eodemque B. Benedicto Aretino substituto, ut dictum est, Fr. Lucas Romam venit Summo Pontisici forsan de rebus Latinorum, &Græcorumin illis partibus relaturus: estque hic primus Provinciæ Romaniæ, sive GræciæMinister, non autem B. Benedictus memoratus, ut alii existimarunt: & declaratus idem credi potest an. 1216. in Comitiis Generalibus prope Assisium coactis, in quibus ex variis auctoribus apud Waddingum ad eum annum n. 1. & 2. assignati fuerunt pro omnibus Fidelium Christi partibusMinistri, & Prælati, & ad universas ferme Europæ Provincias, & Regiones Fratres destinati, quorum Superioribus commissa fuit auctoritas alios huic sodalitio aggregandi.