« bullarium-franciscanum-4718 »

Venerabili fratri episcopo Leodiensi.

Illorum vota benigno favore prosequimur, qui zelo divini amoris accensi ad ampliandum cultum divinum et construendum et dotandum ecclesias seu monasteria de ipsorum propriis facultatibus devotis et laudabilibus desideriis animantur. Cum itaque, sicut petitio dilecti filii nobilis viri Gerardi de Pomerio militis tuae dioecesis nobis nuper exhibita continebat, idem Gerardus fervore devotionis accensus quoddam monasterium monialium ob reverentiam Dei et beatae Mariae virginis matris eius ac beatae Clarae, ad quas ipse gerit singularem devotionis affectum, fundare cupiat et dotare intendat ac propriis sumptibus, in solo proprio in tua dioecesi consistente, competenter aedificari facere et usque ad competentem sustentationem duodecim vel plurium monialium et aliarum personarum eis necessariarum dotare de propriis bonis suis: nos ipsius Gerardi in hac parte laudabile propositum in Domino commendantes ac cupientes cultum divinum, quantum cum Deo possumus, adaugeri, ipsius Gerardi devotis supplicationibus inclinati, fraternitati tuae, de qua in his et aliis plenam in Domino fiduciam obtinemus, per apostolica scripta mandamus et committimus, quatenus fundandi, ut praefertur, praedictum monasterium, dote prius ei sufficienter ut praemittitur iuxta tuum arbitrium assignata, iure tamen parochialis ecclesiae et cuiuslibet alterius in omnibus semper salvo, eidem Gerardo militi auctoritate apostolica plenam et liberam licentiam largiaris. Datum Avinione III kalendas augusti anno quarto.