Général
-
Clément VI (1342-1352)
-
Comitissae Terrae novae concedit facultatem ingrediendi mon. Clariss. de Xativa dioec. Valentin.1
-
1343, aprilis 18, Avinione.
-
1343
-
Dilectae in Christo filiae nobili mulieri Margaritae comitissae Terrae novae.
Devotionis tuae sinceritas promeretur, ut, quae a nobis suppliciter postulas, affectu tibi benevolo concedamus. Hinc est, quod nos tuis supplicationibus inclinati, ut cum sex honestis matronis monasterium monialium inclusarum ordinis s. Clarae de Xativa Valentin. dioecesis, per dilectum filium nobilem virum Nicolaum de Iamvilla comitem Terrae novae, virum tuum, et per te ac quondam Saurinama genetricem tuam de bonis vestris olim fundatum, dotatum pariter et constructum, ex causa devotionis, visitationis et consolationis, quibuscumque ipsorum monasterii et ordinis statutis, consuetudinibus ac quibuslibet constitutionibus contrariis nequaquam obstantibus, quotiescumque ad illud ex causa praemissa te declinare continget, libere ingredi et comedere nec non et cum duabus honestis saecularibus mulieribus ibidem licite pernoctare possis, dummodo abbatissae ipsius monasterii ad id accedat assensus, devotioni tuae tenore praesentium indulgemus. Nulli ergo etc. Datum Avinione XIV kalendas maii anno primo.b
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°194., pp.121-122
-
Reg. Vat. t. 151 (Clem. VI a. 1, l. 5), ep. 1713; Wadd. l. c. reg. pont. Clem. VI n. 41. Cfr. supra n. 48 et 77 atque infra n. 753a et 1241.
1 -
(a) Cogn. Denteza, relictam viduam Rogerii de Lauria admirati regni Aragoniae. Cfr. huius op. t. V p. 301, n. 611, ubi perperam « Laurina » pro « Saurina » legitur.
-
(b) Aliis litteris eodem die datis (l. c. ep. 1715) S. P. praedicto Nicolao de Iamvilla comiti Terrae novae ipsi facultatem illud monasterium intrandi concedit.