« bullarium-franciscanum-4492 »

Dudum ad audientiam apostolatus nostri fidedigna relatione deducto, quod venerabilis frater noster Franciscus Camerinensis episcopus, si dici tunc venerabilis merebatur, non attendens prudenter, quod secta Fraticellorum seu fratrum illorum, qui se de paupere vita nuncupari faciebant, dudum fuerat per providentiam sedis apostolicae reprobata et perpetuae prohibitioni subiecta, nonullos tales Fraticellos, qui post reprobationem et prohibitionem praedictas in civitate et dioecesi Camerinen. et aliis partibus marchiae Anconitanae etiam latitando interdum degentes diversos periculosos errores et haereses seminabant et dogmatizabant, quibus fideles simplices partium earumdem moliebantur inficere, publice receptarat eisque favebat multipliciter et tandem non absque magnae temeritatis audacia de facto habitum et regulam contra prohibitionem praedictam eis dederat in contemptum et contumeliam dictae sedis, periculum fidelium et fidei catholicae detrimentum, hos et alios execrandos excessus super hiis et aliis dampnabiliter committendo: Nos praemissa, quae, sicut habebat relatio fide digna, in partibus illis adeo erant notoria, quod nulla poterant tergiversatione celari, salva conscientia nequeuntes sub dissimulatione transire, eundem episcopum propter haec et alia peremptorie citari fecimus, ut certo termino iam elapso se personaliter apostolico conspectui praesentaret, excusaturus se de praemissis, si posset, vel pro demeritis recepturus. Cum autem idem episcopus per procuratorem suum, quem ad hoc specialiter ad Romanam curiam destinavit, proponi fecerit coram nobis, quod ipse personalibus et realibus impedimentis legitimis ad veniendum personaliter ad sedem Apostolicam fore dinoscitur praepeditus, nos volentes propterea super huiusmodi personali comparitione ipsius et praemissis aliis misericorditer agere cum eodem, discretioni tuae per apostolica scripta committimus et mandamus, quatenus eodem episcopo ad tuam praesentiam evocato ac ab ipso iuramento recepto, quod dictis Fraticellis favorem de cetero non impendat, sed pro posse persequatur eosdem, ipsum ab excommunicationis sententia, quam ex dicto favore eisdem Fraticellis impenso noscitur incurrisse, si id humiliter petierit, iuxta ecclesiae formam nec non a citatione praedicta de munere nostrae gratiae specialis absolvas et nihilominus cum eodem super irregularitate, si quam sic ligatus celebrando divina vel se ingerendo eisdem vel alias ea, quae sunt episcopalis ordinis, exercendo (non tamen in contemptum clavium) contraxit, auctoritate nostra dispenses, iniungens sibi super hiis poenitentiam salutarem et alia, quae de iure fuerint iniungenda. Dat. Avinione idibus februarii anno quinto.