« bullarium-franciscanum-4214 »

Venerabili fratri ‥ episcopo Constantiensi.

Petitio pro parte dilectarum in Christo filiarum ‥ abbatissae et conventus monasterii sororum de Sevelingen ordinis sanctae Clarae tuae diocesis nobis exhibita continebat, quod ipsae in parrochiali ecclesia in Harthusen et in capellis in Erichenstein ac Burlavingen eiusdem diocesis ius obtinent patronatus et quod interdum, cum ecclesia et capellae praedictae vacant pro tempore, et interdum etiam, cum non vacant, nobiles et potentes vicini, interdum alii praedones et latrones, in quorum medio ecclesia et capellae praedictae consistunt, eas etiam temeritate propria recipiunt et occupant eorumque filiis seu consanguineis (etiam ad obtinendum illas aetatem legitimam non habentibus) ipsas assignant dictasque abbatissam et conventum interdum ad consentiendum eis in praemissis per destructionem bonorum dicti monasterii pro sua voluntate compellunt: sicque multa animarum exinde pericula oriuntur et eisdem abbatissae et conventui dampna propter hoc et scandala gravia generantur. Quare pro parte ipsarum fuit nobis humiliter supplicatum, ut statui et quieti earum salubriter provideretur et, ut ipsae ab huiusmodi dampnis, scandalis et periculis liberentur, dictas ecclesiam et capellas, quarum omnium fructus, redditus et proventus sexaginta librarum turonensium parvorum secundum taxationem decimae sicut asseritur valorem annuum non excedunt, cum omnibus iuribus et pertinentiis earundem eisdem abbatissae et conventui auctoritate apostolica in perpetuum annectere et unire de speciali gratia dignaremur. Quia igitur de praemissis notitiam non habemus, fraternitati tuae, de qua plenam in Domino fiduciam gerimus, per apostolica scripta committimus et mandamus, quatenus, si est ita, praefatas ecclesiam et capellas cum omnibus iuribus et pertinentiis earundem eisdem abbatissae et conventui et per eas monasterio memorato auctoritate apostolica in perpetuum unias et annectas, eas per dictas abbatissam et conventum in usus earum proprios perpetuo concedendo: ita quod ecclesiae ac capellarum praedictarum rectoribus, qui nunc sunt, cedentibus vel decedentibus vel ecclesia et capellis praedictis quocunque alio modo vacantibus dictae abbatissa et conventus corporalem possessionem ecclesiae et capellarum praedictarum ac omnium iurium et pertinentiarum ipsarum, per se vel procuratores suos libere apprehendere valeant et tenere, tua vel alterius cuiuscunque super hoc licentia minime requisita; reservatis tamen de dictarum ecclesiae et capellarum fructibus, redditibus et proventibus perpetuis vicariis in eis in divinis officiis servituris, ad praesentationem dictarum abbatissae et conventus instituendis ibidem, congruis portionibus, ex quibus possint commode sustentari, iuria episcopalia solvere et alia sibi incumbentia onera supportare: contradictores auctoritate nostra appellatione postposita compescendo, non obstantibus etc. Dat. Avinione, idibus iunii, anno quintodecimo.