« bullarium-franciscanum-4200 »

Nobili viro Bonifatio comiti de Domnoratico.

Dignum arbitramur et congruum, ut votis tuis in iis, quae ad augmentum cultus divini pertinent et salutem animarum respiciunt, cum omni promptitudine favorabiliter annuamus. Sane porrectae nobis pro parte tua petitionis series continebat, quod tu pia devotione ductus, cupiens transitoria in aeterna et terrena in coelestia felici commercio commutare, ad laudem omnipotentis Dei et honorem beatae Clarae tuaeque ac progenitorum tuorum et aliorum multorum animarum salutem monasterium sub vocabulo et ordine dictae sanctae, in quo quadraginta moniales ordinis eiusdem sanctae inibi collocandae ac claudendae perpetuum exhibeant Domino famulatum, cum domibus et officinis tam pro ipsis quam etiam pro quatuor fratribus de ordine Minorum ad ministrandum eis sacramenta ecclesiastica deputandis necessariis ac etiam opportunis in civitate Pisana fundare et aedificare proponis tuis sumptibus et expensis. Quare nobis humiliter supplicasti, ut tibi monasterium, domos et officinas huiusmodi fundandi, in quo abbatissa et moniales praedictae collocari et includi valeant commode ac ibidem perpetuo virtutum Domino famulari, largiri licentiam et hortum ecclesiae seu prioratus s. Martini Pisan., siti in quarterio Chiusicae in contrada, quae dicitur Guastolongo, ubi monasterium, domus et officinae huiusmodi fundari et aedificari possint, nec non ecclesiam seu prioratum ipsum, nunc rectore seu priore carentem, cuius redditus et proventus annui quadrigentos florenos auri valere dicuntur, cum claustro ac aliis omnibus possessionibus, iuribus et pertinentiis suis eidem monasterio, postquam fundatum fuerit, in perpetuum concedere, incorporare et annectere dignaremur. Nos igitur eximiae devotionis affectum, quem ad nos et Romanam ecclesiam te habere novimus, diligentius attendentes ac te volentes in huiusmodi tuo proposito, quod gratum reputamus Altissimo, sufficienti dote prius dicto monasterio (redditibus computatis ecclesiae seu prioratus praedicti) ad dioecesani arbitrium assignata, monasterium, domos et officinas huiusmodi tam pro monialibus quam pro fratribus memoratis in horto praedicto aedificandi devotioni tuae plenam et liberam licentiam tenore praesentium elargimur: volentes et nihilominus concedentes, quod dilectus filius minister fratrum dicti ordinis Minorum in provincia Pisana de monasteriis dicti ordinis eiusdem sanctae dictae provinciae duodecim vel tredecim moniales (religionis zelo, honestate vitae ac institutis instructas regularibus et morum maturitate pollentes) in dicto monasterio, postquam fundatum fuerit, collocandas, per quas aliae virgines in eodem monasterio religionis habitum assumentes de sanctitate vitae, honestate morum ac institutis regularibus salubriter valeant informari, nec non dictos quatuor fratres pro missa et aliis divinis officiis congruis horis et temporibus etiam solemniter (contraria monasteriorum dicti ordinis eiusdem sanctae illarum partium non obstante consuetudine) memoratis abbatissae et monialibus eiusdem monasterii, quas inclusas ibidem esse volumus, et ipsarum familiaribus celebrandis ac ministrandis ecclesiasticis sacramentis possit, prout suae discretioni videbitur, assumere ac etiam deputare. Cui quidem monasterio praefatam ecclesiam seu prioratum sancti Martini cum praedicto claustro et omnibus aliis possessionibus, iuribus et pertinentiis suis, salvo tamen iure archiepiscopali, apostolica auctoritate concedimus, incorporamus, unimus, et annectimus de gratia speciali; volentes tamen, quod canonicis, qui nunc sunt ecclesiae supradictae, locus conveniens pro ipsorum habitationibus et sufficiens provisio dicti dioecesani arbitrio assignentur de proventibus ecclesiae supradictae, in quibus quidem provisione et loco eisdem canonicis cedentibus vel decedentibus quatuor presbyteri subrogentur, qui in eadem ecclesia parocchianis ipsius missas et alia divina officia celebrent et ministrent ecclesiastica sacramenta. Qua quidem assignatione facta dictoque fundato et aedificato monasterio ac abbatissa et conventu praedictis collocatis et inclusis ibidem ipsae abbatissa et conventus possint corporalem possessionem ecclesiae seu prioratus, claustri, possessionum, iurium et pertinentiarum praedictorum propria auctoritate libere recipere, apprehendere et etiam retinere (assensu cuiusquam minime requisito) fructusque, redditus et proventus ipsorum in utilitatem praelibati monasterii convertere, prout eis utilius videbitur expedire. Nulli ergo etc. Datum Avinione, VIII kal. martii, anno quintodecimo.