« bullarium-franciscanum-4183 »

Dilectis filiis abbati monasterii Leicestriae Lincolnien. dioecesis ac priori Wigornien. ac Guillelmo de Melburno canonico Lichefelden. ecclesiarum.

Exhibita nobis dilecti filii nobilis viri Henrici Lancastriae et Leicestriae comitis ac senescalli Angliae petitio continebat, quod olim quondam Edmundus Lancastriae et Leicestriae comes, natus clarae memoriae Eduardi regis Angliae, pater suus, cupiens terrena in coelestia et transitoria in aeterna felici commercio commutare, locum fratrum ordinis Minorum de Prestona Lichefelden. dioecesis in comitatu suo Lancastriae consistentem suis propriis fundavit sumptibus pariter et construxit dictumque locum a primaria fundatione ipsius fecit custodiae fratrum dicti ordinis Wigornien. per praelatos eiusdem ordinis assignari. Quare praefatus Henricus comes nobis humiliter supplicavit, ut votum et factum dicti patris acceptare et incorporationem dicti loci eidem Wigornien. custodiae dictorum fratrum confirmare de benignitate apostolica dignaremur. Nos itaque, piis votis eiusdem Edmundi in hac parte benignius annuentes ipsiusque Henrici supplicationibus inclinati, discretioni vestrae per apostolica scripta mandamus, quatenus vos vel duo aut unus vestrum per vos vel alium seu alios, si est ita, quod per eundem Edmundum et praelatos eosdem super praemissis factum est, auctoritate nostra confirmare curetis, ita quod ex tunc locus praedictus sit de Wigornien. custodia praelibata nec praelatis seu fratribus eiusdem ordinis liceat eandem incorporationem infringere nec etiam infirmare: contradictores per censuram ecclesiasticam compescendo, non obstantibus etc. Datum Avinione, VII idus novembris, anno quintodecimo.