« bullarium-franciscanum-4086 »

Venerabili fratri Rogerio episcopo Bivinen.

Superni dispositione consilii etc. Dudum siquidem b. m. Rostagno episcopo Bivinen.a ecclesiae praesidente, nos, cupientes eidem ecclesiae, cum eam quovis modo et ubicumque vacare contingeret, per apostolicae sedis providentiam idoneam providere personam, provisionem ipsius ecclesiae ea vice dispositioni nostrae et sedis eiusdem duximus specialiter reservandam, decernendo ex tunc etc. Deinde vero praefata ecclesia per obitum eiusdem Rostagni, qui in partibus illis diem clausit extremum, pastoris solatio destituta, nos vacatione huiusmodi fidedignis relatibus intellecta, attendentes, quod nullus praeter nos hac vice de ipsius ecclesiae ordinatione se intromittere potest, reservatione ac decreto huiusmodi obsistentibus, ad provisionem ipsius Bivinen. ecclesiae, ne prolixae vacationis exponeretur incommodis, coepimus intendere diligenter; et demum post deliberationem, quam ad deputandum eidem ecclesiae personam utilem ac etiam fructuosam, cuius industria dicta ecclesia in suis valeret iuribus adaugeri ac etiam defensari, cum fratribus nostris habuimus diligentem, ad te ordinis fratrum Minorum professorem, in sacerdotio constitutum, religionis zelo et vitae ac morum honestate decorum, in spiritualibus providum et temporalibus circumspectum, ac aliis virtutum donis, prout fidedignorum habet assertio, multipliciter insignitum, convertimus aciem nostrae mentis. Quibus omnibus debita meditatione pensatis, de persona tua, nobis et eisdem fratribus ob huiusmodi tuorum exigentiam meritorum accepta, de ipsorum fratrum consilio eidem ecclesiae auctoritate apostolica duximus providendum, teque ipsi praefecimus in episcopum et pastorem, curam et administrationem ipsius ecclesiae tibi tam in spiritualibus, quam in temporalibus committendo, et postmodum per venerabilem fratrem nostrum Gaucelinum episcopum Albanen. tibi fecimus munus consecrationis impendi etc. Dat. Avinione, kalendis maii, anno tertiodecimo.b