Général
-
Jean XXII (1316-1334)
-
Michaelem de Caesena ministrum gen. ord. Min. et Bonagratiam de Pergamo fratrem ord. Min., adhaerentes haereticis, qui absque licentia sedis apost. a curia Rom. regressi sunt, necnon mag. Guilelmum Occam eiusdem ord. Min., super crimine haeresis delatum, capi iubet.1
-
1328, maii 28, Avinione.
-
1328
-
Ven. fratribus archiepiscopis, ... et aliis personis ecclesiasticis saecularibus et regularibus necnon nobilibus viris ducibus, principibus ... et communitatibus et universitatibus civitatum, ... ad quos praesentes litterae pervenerint.
Cum Michael de Caesena, olim ordinis fratrum Minorum generalis minister, et Bonagratia eiusdem ordinis super fautoria haereticorum et aliis gravibus et enormibus criminibus et excessibus tam contra Romanam ecclesiam quam ordinem praedictum per eos ut dicebatur commissis dudum coram nobis delati fuissent, nos de criminibus et excessibus huiusmodi volentes inquirere plenius veritatem, eisdem ac eorum cuilibet sub excommunicationis et aliis poenis gravibus, quas eos incurrere volu[i]mus ipso facto, si nostrae inhibitioni praesumerent contraire, duxerimus districtius inhibendum, ne de Romana curia recedere quoquomodo praesumerent absque licentia nostra speciali; praefatique Michael et Bonagratia, tamquam sibi male conscii seque reddentes de fautoria haereticorum et aliis criminibus, super quibus ut praemittitur delati fuerant, suspectos vehementer imo convictos potius, occulte de curia recesserint supradicta: universitatem vestram monemus, rogamus, requirimus attentius et hortamur, quatenus dilectos filios Geraldum de Strata et Petrum Natalis, clericos Lemovicen. et Narbonen. dioec., exhibitores praesentium, et eorum quemlibet, quos ad capiendum praedictos Michaelem et Bonagratiam specialiter destinamus, pro nostra et apostolicae sedis reverentia benigne recommendatos habentes, praefatos Michaelem et Bonagratiam et eorum quemlibet, ubicumque reperti (etiamsi in locis sacris et religiosis) fuerint, ad requisitionem praedictorum Geraldi et Petri et cuiuslibet eorum capiatis et tute custodiatis seu, si secure possit fieri, ad dictam curiam sub fida custodia expensis nostrae camerae transmittatis, vos super praedictis taliter habituri, quod praeter divinae retributionis praemium nostram et apostolicae sedis benedictionem et gratiam valeatis uberius promereri. Dat. Avinione, V kal. iunii, anno duodecimo.a
Eisdem.
Cum Guilelmus Okam de ordine fratrum Minorum, qui super crimine haeresis in curia Romana delatus extiterat, pendente inquisitionis negotio in eadem curia contra ipsum, tamquam sibi male conscius inde nuper occulte absque licentia nostra recesserit, se de dicto crimine reddendo convictum: universitatem etc. ut supra. Dat. ut supra.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°711., p.346
-
Reg. Vat. t. 114, p. II, f. 123, ep. 1332; cfr. supra p. 343 not. ad n. 706 versus finem.
1 -
(a) In e. m. nobili viro Conrado Spinulae regni Siciliae amirato die 29 maii 1328 (l. c. f. 222, ep. 2023).