« bullarium-franciscanum-3801 »

Eisdem priori [Praedicatorum] et guardiano [Minorum ordinum fratrum Tolosan.].

Dudum ad audientiam nostram infestae relationis assertione producto, quod inter dilectos filios nobiles viros Petrum Raymundi et Guidonem de Convenisa fratres ex parte una, et dilectam in Christo filiam nobilem mulierem Alionordem de Monteforti comitissam Vindocinensemb ex altera, humani generis inimico superseminante zizania, gravis erat materia dissensionis suborta, nos more pii patris, quem non praetereunt incommoda filiorum, ad huiusmodi sedandam discordiam et turbatae pacis inter eos proxima sanguinis connexitate coniunctos foedera reformanda vigilantibus studiis intendentes, partes ipsas super hoc paternis affectibus et salutaribus monitis multipliciter duximus exhortandas, quamvis hostis eiusdem praevalente malitia nondum fuerit nostris in hac parte desideriis satisfactum. Propter quod verentes pericula, quae nedum ipsis partibus sed multis aliis ipsa dissensio comminatur, eisque salubriter occurrere cupientes, partibus ipsis iterata dirigimus exhortatoria super hiis scripta nostra, ut una vel duas communes personas pacis et concordiae huiusmodi fervidas zelatrices procurent eligere, quae pacis iaceant inter eos semina et vepres dissensionum extirpent. Porro, quia vox viva magis consuevit imprimere quam ipsa series litterarum, vos, de quorum circumspectione plene confidimus, ad huiusmodi ministerium exequendum velut pacis angelos providimus destinandos. Quocirca discretioni vestrae per apostolica scripta mandamus, quatenus vos ad earundem partium auctoritate praesentium conferentes et eisdem litteras nostras, quas ut praemittitur sibi dirigimus, praesentantes, partes ipsas ad eligendum unum vel duos huiusmodi pacis et concordiae tractatores communes, per quorum circumspectam industriam votivae pacis, actore Deo, fructus proveniant, viis et modis ad hoc expedientibus inducere secundum datam a Deo vobis prudentiam studeatis etc. Datum ut supra [Avinione, XVII kal. septembris, anno septimo].