Général
-
Jean XXII (1316-1334)
-
Committit episcopo Nitrien. et archidiaconis Nitrien. ac Trinchin., quod fr. Andreae (ord. Praed.) episcopo Alben. faciant restitui quaedam bona, quae erant Martini (ex ord. Min.) praedecessoris.1
-
1323, februarii 28, Avinione.
-
1323
-
Venerabili fratri ‥ episcopo Nitriensi et dilectis filiis ‥ Nitriensis ac ‥ Trinchiniensisa Nitriensis dioecesis archidiaconis ecclesiarum.
Venerabilis frater noster Andreas episcopus Albensis in Ungaria [exposuit], quod bo. me. Martino ordinis fratrum Minorum episcopo Albensi, praedecessore ipsius, in regno Boemiae, unde originem traxerat, videlicet in Olomucensi dioecesi decedenteb bona mobilia, quae ratione episcopalis dignitatis seu officii ecclesiae Albensi idem Martinus dum vixerat ibidem acquisiverat, venerabilis frater noster [Conradus] episcopus Olomucensisc nec non fratres dicti ordinis conventus Brunensis et nonnullae personae ecclesiasticae et etiam saeculares eiusdem dioecesis nequiter occuparunt et ipsa detinent occupata, quamquam praedicta bona ad dictam Albensem ecclesiam noscantur rationabiliter pertinere. Quocirca discretioni vestrae per apostolica scripta mandamus, quatenus vocatis, qui fuerint evocandi, si vobis simpliciter, summarie et de plano sine strepitu et figura iudicii constiterit de praemissis, praefatum episcopum Olomucensem et quoscunque alios occupatores et detentores dictorum bonorum, cuiuscunque dignitatis, status et ordinis vel conditionis existant, quod praedicta bona eidem Andreae episcopo nomine dictae Albensis ecclesiae restituant, ut tenentur, auctoritate nostra appellatione postposita compellatis. Testes autem etc. Datum Avinione, II kalendas martii, anno septimo.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°490., pp.248-249
-
Reg. Vat. t. 74, f. 256, ep. 733.
1 -
(a) Trencsén dioec. Nitrien. (Nyitra, Neutra) in Hungaria.
-
(b) Scilicet a. 1321 in conventu fratrum Min. Brunen. (Brno sive Brünn in custodia Moraviae prov. Boemiae), quae civitas tunc ad dioec. Olomucen. pertinebat, nunc autem ipsa sedes episcopalis est.
-
(c) Cuius suffraganeum iste Martinus agebat. Hic a. 1306 una cum Antonio episcopo Cenadien. (ex ord. Min.) Patavii litteras de concessis quibusdam indulgentiis dedit et a. 1320 festo Pentecostes presbyterium ecclesiae dictorum fratrum Min. Brunen., dum ibi capitulum provinciale celebratur, consecravit.