« bullarium-franciscanum-3782 »

Venerabili fratri Guillelmo episcopo Sagonen.

Cura pastoralis officii etc. Olim siquidem bonae memoriae Guarcino episcopo Sagonen. praesidente regimini Sagonen.a ecclesiae, nos cupientes ecclesiae praefatae, cum per ipsius Guarcini obitum vel alio quovis modo vacare contingeret, personam utilem praesidere, provisionem ipsius ecclesiae Sagonen., cum vacaret, nostrae ac sedis apostolicae dispositioni duximus reservandam, decernendo extunc etc. Postmodum vero dicto Guarcino Parisiis rebus humanis exempto, nos attendentes, quod nullus praeter nos de ordinatione ipsius ecclesiae Sagonen. ea vice se intromittere poterat, reservatione huiusmodi nostra obsistente, de praeficiendo eidem ecclesiae Sagonen. approbatam idoneamque personam cogitare coepimus diligenter et post deliberationem, quam cum fratribus nostris super hoc attentam habuimus, demum in te fratrem ordinis Minorum, quem in sacerdotio constitutum et sufficienter in sacra pagina peritum fel. rec. Clemens papa V praedecessor noster fecit in episcopum consecrari atque ad praedicandum in terra Tartarorum verbum Dominicum deputavit, aciem direximus nostrae mentis ac de persona tua nobis et eisdem fratribus, propter grandia dona virtutum, quas in te ipsarum Dominus inplantavit et super quibus fide dignis testimoniis commendaris, accepta eidem ecclesiae Sagonen. de dictorum fratrum consilio auctoritate apostolica providemus teque ipsi praeficimus in episcopum et pastorem, curam et administrationem illius tibi tam in spiritualibus quam in temporalibus plenarie committendo, liberamque tibi concedendo licentiam te ad eamdem ecclesiam conferendi etc. Datum Avinione, II kal. martii, anno septimo.