« bullarium-franciscanum-3710 »

Venerabili fratri Raymundo episcopo Theatino.

Romani pontificis etc. Dudum siquidem ecclesia Theatinaa ad Romanam ecclesiam immediate spectante per obitum bonae memoriae Petri episcopi Theatini pastoris solatio destituta, dilecti filii capitulum ipsius ecclesiae (vocatis omnibus, qui voluerunt, debuerunt et potuerunt commode interesse pro electione futuri episcopi inibi celebranda), die ad hoc praefixa convenientes in unum, dilectum filium Guillelmum de Gigniacob ordinis fratrum Minorum in eorum et dictae ecclesiae episcopum per viam compromissi concorditer elegerunt, qui post consensum per eum huiusmodi electioni de sui superioris licentia praestitum personaliter ad apostolicam sedem accedens, praesentato nobis eiusdem electionis decreto, a nobis humiliter petiit, ut electionem confirmaremus eandem, in omnibus hiis statutis a iure temporibus observatis. Cumque procurator ipsius ordinis procuratorio nomine eiusdem ordinis electioni huiusmodi se opponens electionem ipsam certis impugnaret ex causis et occasione oppositionis huiusmodi inter eosdem Guillelmum et procuratorem fuisset coram aliquibus ex fratribus nostris Romanae ecclesiae cardinalibus (successive super hoc a nobis auditoribus eisdem partibus deputatis) diutius litigatum, tandem, causa huiusmodi ultimo coram dilecto filio nostro Petro tituli sanctae Susannae presbytero cardinali pendente, dictus Guillelmus (volens vitare litigiorum anfractus et dictam ecclesiam a longioris vacationis incommodis praeservare) omni iuri, quod sibi ex huiusmodi electione quomodolibet competebat, pure ac libere in manibus nostris sua sponte renuntiare curavit. Nosque renuntiationem huiusmodi admittentes ac de ipsius ecclesiae provisione celeri, ne ulterius vacationis remaneret exposita detrimentis, sollicite cogitantes, ad te tunc episcopum Albensem, virum quoque vitae laudabilis ac morum honestate decorum, litterarum scientia praeditum, in spiritualibus providum et temporalibus circumspectum, nec non in executione pontificalis officii comprobatum, direximus aciem nostrae mentis: quibus omnibus debita meditatione pensatis, volentes de persona tua eidem Theatinae ecclesiae providere, te a vinculo, quo Albensi ecclesiae, cui praeeras, tenebaris adstrictus, de fratrum nostrorum consilio et apostolicae plenitudine potestatis absolvimus, teque ad ecclesiam Theatinam transferimus supradictam ac te ipsi in episcopum praeficimus et pastorem, curam et administrationem illius tibi in spiritualibus et temporalibus committentes ac liberam tribuentes tibi licentiam ad ipsam Theatinam ecclesiam transeundi etc. Datum Avinione, IX kalendas martii,c anno quinto.d