« bullarium-franciscanum-3685 »

Venerabili fratri archiepiscopo Bisuntin. et dilectis filiis decano Constantien. ac succentori sancti Ioannis Bisuntin. ecclesiarum.

Dudum dilectis filiis ministro et fratribus ordinis Minorum significantibus nobis, quod, licet tertius ordo fratrum et sororum, qui continentes seu de poenitentia nuncupantur, a beato Francisco institutus et a sede praefata iam dudum approbatus et confirmatus ac etiam communitus diversis privilegiis extitisset etc. ut supra n. 354.

Et licet huiusmodi litterae ad venerabilis fratris nostri Geraldi episcopi Basileen.a et Richardi officialis sui notitiam devenissent et ex parte dictorum ministri et fratrum Minorum humiliter requisiti fuissent, ut fratres et sorores dicti tertii ordinis in suis dioecesi et civitate constitutos dictosque fratres Minores occasione constitutionis praedictae,b quae, ut praemittitur, ad dictos fratres et sorores eiusdem tertii ordinis extendi minime noscebatur, iuxta mandatum nostrum per dictas litteras eis factum nullatenus molestarent nec permitterent ab aliis molestari, sed gravamina, si qua praetextu constitutionis huiusmodi eis intulerant vel inferri fecerant, revocarent: iidem tamen episcopus et officialis, praedictis litteris non absque magnae temeritatis audacia, irreverentia et contemptu illudentes potius quam parentes, infrascriptis personis quilibet eorum litteras infrascriptas, videlicet suis sigillatas sigillis, dirigere temere praesumpserunt. Quae quidem litterae eorum sigillis munitae cum fuissent ad sedem apostolicam destinatae et ad notitiam nostram deductae, nos dilecto filio nostro Petro tituli sanctae Susannae presbytero cardinali commisimus oraculo vivae vocis, ut, an dictae litterae verae essent ac veris dictorum episcopi et officialis sigillis munitae, se diligentius informaret. Qui tam per procuratorem praefati episcopi apud sedem apostolicam personaliter constitutum quam per nonnullos alios fide dignos de partibus illis ad suam propter hoc praesentiam accersitos, qui litteras et sigilla praedicta eis ostensa recognoverunt praesentialiter esse vera, certioratus, quod dictae litterae verae erant et veris dictorum episcopi et officialis sigillis munitae, nobis fecit super hoc relationem plenariam et fidelem, propter quod earum litterarum tenores de verbo ad verbum praesentibus duximus inserendos, qui tales sunt: « Geraldus Dei gratia Basilien. episcopus dilectis in Christo universis decanis, camerariis, rectoribus, incuratis, vicariis et capellanis ecclesiarum civitatis et dioecesis nostrae Basilien. salutem in Domino Iesu Christo. Cum nos ad instantiam fratrum Minorum quoddam “vidimus” de quibusdam litteris papalibus ad honorem et reverentiam summi pontificis domini nostri et sedis apostolicae dederimus: ne propter hoc de observatione processuum nostrorum quorumcumque a nobis vel auctoritate nostra emanatorum aliquod dubium propter ignorantiam multorum simplicium oriri contingat, vobis universis universaliter et singulis singulariter significamus in his scriptis, quod propter donationem dicti “vidimus” nolumus processibus nostris quibuscumque in aliquo derogari. Datum apud Telpergc sub sigillo nostro anno Domini mcccxix in vigilia Pentecostes ».

« Officialis curiae Basilien. decano citra Otensbusel ceterisque confratribus eiusdem decanatus salutem in Domino. Nuper ad nostrum veridicorum relatione pervenit auditum, quod fratres Minores quasdam bullas papales in ecclesiis vestris et in dioecesi Basilien. deferunt et ostendunt, per quas sententias et processus a nobis contra eosdem et Beghinas habitum Bighinagii deferentes auctoritate ordinaria latos et latas evadere moliuntur, quocumque praetextu asserunt, Beghinas de tertia regula in pristino statu debere remanere. Quare mandamus vobis universis et singulis (sub poena suspensionis ab officio, quam in contrarium facientes, monitione trium dierum praemissa, ferimus in his scriptis), quatenus (dictis bullis ostensis et ostendendis non obstantibus, quibus per vos nullam fidem seu credulitatem volumus adhiberi) omnes processus nostros contra dictos fratres Minores et Beghinas et eorum fautores latos secundum eorum continentiam et tenorem publicetis, observetis et ab omnibus faciatis inviolabiliter observari, ipsosque fratres et Beghinas arctius evitetis, donec a domino nostro episcopo vel nobis aliud receperitis in mandatis. Datum anno Domini mcccxix, feria quinta ante dominicam palmarum ».

Nolentes igitur tantae praesumptionis excessum conniventibus oculis pertransire, ne ipsorum impunitas praebeat aliis audaciam similia committendi, discretioni vestrae in virtute obedientiae districte praecipiendo mandamus, quatenus vos vel duo aut unus vestrum (per vos vel alium seu alios) praefatos episcopum et officialem ex parte nostra peremptorie citare curetis, ut idem episcopus sub suspensionis infra duorum mensium spatium, dictus vero officialis sub excommunicationis poenis infra viginti dies post citationem vestram huiusmodi (quas poenas eos incurrere volumus ipso facto, nisi fecerint, quod eisdem iniungitur) apostolico se conspectui repraesentent, super his facturi et recepturi, quod iustitia suadebit, eisdem episcopo et officiali (eorum videlicet cuilibet sub poenis similibus, quas eos incurrere volumus ipso facto, si infrascripto mandato non paruerint cum effectu) similiter iniungentes, ut, cum occasione constitutionis praedictae contra fratres et sorores dicti tertii ordinis et contra fratres Minores praefatos et participantes cum eis ante receptionem dictarum litterarum nostrarum, et post de facto, nonnullos propter praemissa dicantur fecisse processus, in eos etiam excommunicationis, suspensionis et interdicti sententias proferendo, processus et sententias huiusmodi propter praemissa habitos et praelatos,d prout de facto fecerunt, eosdem de facto debeant revocare et revocatos fore in praedictis civitate et dioecesi facere publicari, quodque deinceps a similibus debeant abstinere. Diem vero citationis et iniunctionis huiusmodi, et quidquid super his duxeritis faciendum, nobis per vestras litteras harum seriem continentes fideliter intimare curetis. Datum Avinione, XIV kalendas maii, anno quarto.e