« bullarium-franciscanum-3616 »

Venerabili fratri Conrado ordinis fratrum Minorum episcopo in archiepiscopum Ephesin. electo.

Decet et expedit etc. Sane petitio tua nobis exhibita continebat, quod venerabilis frater noster patriarcha Constantinopolitanus, intendens ecclesiae Ephesinae in patriarchatu Constantinopolitano constitutae, cuius ad eum dicebatur provisio pertinere, quae ab hostibus fidei (quod dolenter referimus) occupata tenetur, ad consolationem et salutem fidelium, qui inibi remanserunt, et liberationem ipsius a manibus hostium praedictorum de opportuno praesule providere, deliberatione praehabita super hoc diligenti, tandem in te convertit oculos mentis suae ac de te utique viro litterarum scientia praedito, morum gravitate decoro, conversatione placido, in officio sanctae praedicationis instructo ac in spiritualibus et temporalibus circumspecto, eidem ecclesiae Ephesinae duxit auctoritate ordinaria providendum, teque praefecit eidem ecclesiae in episcopum et pastorem, tibi curam et administrationem ipsius in spiritualibus et temporalibus committendo, tibique subsequenter munus consecrationis impendit. Verum quia propter longam vacationem eiusdem ecclesiae a nonnullis non improbabili rationis iudicio dicebatur, quod praefatus patriarcha nequiverat ad praemissa procedere sine auctoritate super hoc habita a sede apostolica speciali, nobis humiliter supplicasti, ut providere tibi super hoc de opportuno remedio dignaremur. Nos igitur attendentes praemissa et plura alia tibi virtutum merita suffragari, ex quibus spem firmam concepimus, quod per te, utpote virum in diversis scientiis et linguis peritum, sanctae conversationis, vitae laudabilis et in agendis plurimum circumspectum, Dominus in illis partibus multorum poterit operari salutem, et praedictam ecclesiam a spurcidorum manibus liberare et praestare consilium ad proximas dudum partes catholicas, schismaticorum contagio depravatas, ad callem verae fidei reducendas: quod per dictum patriarcham circa provisionem et praefectionem de te factas eidem ecclesiae Ephesinae et consecrationem tuam huiusmodi postmodum subsecutam factum est, ratum et gratum habentes, id ex certa scientia de fratrum nostrorum consilio et apostolicae potestatis plenitudine confirmamus, ratificamus et etiam approbamus (omnem defectum, si quis ex eo, quod provisioni huiusmodi absque speciali licentia ministri generalis tui ordinis consensisti, licet a vicario generali eiusdem ministri super hoc licentiam obtineres, vel quocumque alio modo in tua provisione et praefectione huiusmodi forsitan extitisset, supplentes de ipsorum fratrum consilio et eiusdem plenitudine potestatis) et nihilominus ad maiorem tui securitatem te eidem ecclesiae Ephesinae de ipsorum fratrum consilio auctoritate apostolica de novo praeficimus in archiepiscopum et pastorem, curam et administrationem praedictas tibi in spiritualibus et temporalibus committendo. Nulli ergo etc. Datum Avinione, IV nonas iulii, anno secundo.