Général
-
Clément V (1305-1314)
-
Mandat ministro provinciali Provinciae, ut cum aliis fratribus Minoribus inferius nominatis personaliter coram ipso compareat.1
-
1312, iulii 23, Grauselli.
-
1312
-
Cum nos te ac dilectos filios fratres Iacobum Bernardi Narbonen., Dalphinum Massilien., Raynes Systaricen., Iohannem Bonifatii Avinionen., Dalmasium Arelaten., Raymundum Boverii de Montepesulano et Petrum Guiraudi de Alesto custodes, ac Petrum de Pullis dicti loci de Montepesulano, Magalonen. et Nemausen. dioecesium, Guillelmum Marthialis eorumdem Narbonen., Guillelmum de Petra Aurasicen.c et Petrum Augerii ipsorum Avinionen. guardianos, Iohannem de Fonte lectorem ipsorum dicti loci de Montepesulano fratrum ordinis Minorum, ac Iohannem de Verunis inquisitorem haereticae pravitatis in provincia Provinciae,d et Michaëlem Monachie ac Guillelmum Agadesani eiusdem ordinis, super certis negotiis ordinem ipsum contingentibus alloqui specialiter intendamus, volumus et discretioni vestrae per apostolica scripta mandamus, quatenus (per te vel per alium seu alios) dictos fratres et eorum quemlibet praesentialiter, si eorum commode poteris habere praesentiam, alioquin in eorum conventibus, ex parte nostra peremptorie citare procures, ut ipsi et eorum quilibet in virtute obedientiae et sub poena excommunicationis compareant et tu similiter compareas infra mensem (a die, qua praesentes receperis, numerandum) personaliter coram nobis, audituri super eisdem negotiis nostrae beneplacitum voluntatis et illud efficaciter impleturi. Volumus autem, quod sic huiusmodi citationem accelerare procures, quod praedicti fratres excusationem praetendere nequeant, quod propter retardatam per te citationem eamdem non possint in dicto termino apostolico se conspectui praesentare. Diem vero receptionis et citationis huiusmodi, et quidquid super praemissis tu aut ille vel illi, cui vel quibus id ut praemittitur commiseris, duxeris faciendum, nobis per tuas litteras harum seriem continentes intimare fideliter non obmittas. Datum in prioratu de Grausello prope Malausanam Vasionen. dioecesis, X kalendas augusti, pontificatus nostri anno septimo.f
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°203., pp.89-90
-
Reg. Vat. t. 59, f. 243, ep. 96 de curia (n. 8851). Cfr. supra n. 158 not. 1.
1 -
(a) Gerardo Villete.
-
(b) Haec provincia erat divisa in custodias Narbonen. (Narbonne), Montis Pesulani (Montpellier), Alesti (Alais), Nemausi (Nîmes), Avinionen. (Avignon), Arelaten. (Arles), Massiliae (Marseille) et Sistaricen. (Sisteron).
-
(c) Orange in custodia Avinionen.
-
(d) Cfr. Wadd. Ann. Min. ad a. 1312, n. 11, et a. 1317, n. 13.
-
(e) Socium, ut videtur, praedicti inquisitoris. Cfr. l. c. ad a. 1317, n. 13 et 14.
-
(f) Praedicti superiores provinciae Provinciae a fratribus « Spiritualibus » in ea degentibus denuntiati erant, quod in ipsos severius agerent. Quos Clemens ad se vocatos in consistorio coram arguit, ab officio amovet, fratribus Guidoni et Vitali de Furno ord. Min. imperat, ut illorum loco Spiritualibus superiores alios eosque magis benevolos provideant.