« bullarium-franciscanum-3393 »

Venerabili fratri Aegidio patriarchae Graden., et dilectis filiis fratribus Lapo Praedicatorum et Artinisio Minorum fratrum ordinum procuratoribus in Romana curia generalibus.a

Benedictus Deus, Pater Domini nostri Ihesu Christi etc. Verum, ut tantae salutis opus ac tanti boni felix auspicium optatum favente Domino sortiantur effectum, te, frater patriarcha, et vos, dilecti filii Lape Praedicatorum et Arthinisi Minorum fratrum ordinum procuratores in Romana curia generales, pro his exequendis ad eumdem regem tamquam salutis et pacis angelos iuxta eiusdem magnificentiae regiae instantiam destinamus, quorum salutaribus eruditionibus, favente illo, in cuius manu regum corda consistunt, ipsum dominum nostrum Iesum Christum perfecte idem rex cognoscet et suum gloriosum nomen catholicae fidei observatione colere non postponet, ac status eius supra firmam petram ecclesiae apostolicae solidatus spiritualibus et temporalibus proficiet incrementis, ipseque rex demum coronam perennis gloriae consequetur. Quocirca discretioni vestrae, de qua plenam in Domino fiduciam obtinemus, per apostolica scripta mandamus, quatenus ad praesentiam dicti regis vos personaliter conferentes et habentes prae oculis solum Deum, ipsum regem et personas alias supradictas ad unitatem verae fidei et communionem sanctae Romanae ecclesiae salubribus inducatis monitis et inductos ut praemittitur recipiatis eosdem. Quod si annuente Deo tam circa catholicam fidem quam circa praemissa alia, quae fieri volumus per regem ipsum et alios, de quibus supra fit mentio, veraciter compleantur, auctoritate nostra regem eundem et regnum sub protectione dictae sedis apostolicae recipiatis et nostra et vexillum ab eo ex devotione petitum contra infideles illarum partium (sine alterius praeiudicio) usque ad beneplacitum apostolicae sedis tradatis eidem, ipso rege et aliis de dicto regno, qui propter schisma et non recognoscendo primatum sanctae Romanae ecclesiae excommunicationis vinculo sunt ligati, primitus absolutis; rescripturi nobis super praemissis omnibus plenius veritatem, ut, quidquid factum fuerit super eis et super suis aliis petitionibus (quas, prout honestatem ecclesiae decebit, licebit ac expedire viderimus, exaudire proponimus), cum dictis fratribus nostris plene deliberare possimus. Intendimus enim non solum in his, quae superius praescribuntur, dicto regi nos et apostolicam sedem exhibere favorabiles et benignos, sed etiam in aliis, quae sibi et dicto regno noverimus profutura. Quod autem in fermentato pane per sacerdotes non latinos regni praedicti rite ordinatos in missarum solemniis corpus conficiatur Dominicum, quousque aliud per apostolicam sedem ordinatum fuerit, cum praemissa perfecta extiterint, et quod idem rex interesse possit missis huiusmodi, toleramus. Suscipite igitur hilariter iniuncti laboris munus illudque in spe divini iuvaminis fidelibus portate humeris, ut laudabilis exitus diligentiae vestrae commendet industriam et augeat apud Deum et sedem apostolicam vestrorum cumulum meritorum. Quodsi non omnes his exequendis potueritis interesse, duo vestrum ea nihilominus exequantur. Datum, ut supra (n. 109).