« bullarium-franciscanum-3386 »

Dilecto filio fratri Petro electo Rapollan.

Nuper Rapollan. ecclesia Romanae ecclesiae immediate subiecta pastoris solatio destituta, nos .... te, licet absentem, ordinis fratrum Minorum professum, in sacerdotii ordine constitutum, de fratrum nostrorum consilio et apostolicae plenitudine potestatis eidem Rapollan. ecclesiae praefecimus in episcopum et pastorem etc. Quia vero tibi grave nimis et sumptuosum existeret, ad apostolicam sedem pro consecrationis munere obtinendo personaliter te conferre, nos tuis laboribus et expensis in hac parte benigne parcere intendentes, discretioni tuae suscipiendi consecrationis munus a quocunque malueris catholico episcopo gratiam et communionem apostolicae sedis habente, qui id tibi associatis sibi duobus vel tribus aliis episcopis similem gratiam et comunionem habentibus, cum a te fuerit requisitus, vice nostra valeat impertiri, recepturus a te postmodum idem episcopus, qui tibi munus impertierit praedictum, nostro et ecclesiae Romanae nomine fidelitatis solitae iuramentum iuxta formam, quam tibi sub bulla nostra mittimus interclusam, per te ipsi episcopo assignandam, ac transmissurus nobis per eius proprium nuntium formam iuramenti, quod te praestare contigerit de verbo ad verbum per tuas patentes litteras tuo sigillo signatas, plenam concedimus auctoritate praesentium facultatem. Datum Pictavis, XVIII kalendas februarii, pontificatus nostri anno tertio.