« bullarium-franciscanum-3300 »

Dilecto filio ‥ plebano plebis de Massa del Cozile Lucan. dioec.

Petitio dilectorum filiorum ‥ prioris et ‥ lectoris ordinis fratrum Praedicatorum Lucanorum ac ‥ rectoris hospitalis de Altopassu Lucanae diocesis, executorum testamenti quondam Rufini archiepiscopi Mediolanensis,a nobis exhibita continebat, quod idem archiepiscopus dum viveret quoddam hospitale de bonis ad eum ratione personae suae spectantibus prope castrum Ficechib dictae diocesis construxit pariter et dotavit, in eo pauperes et infirmos recipi faciendo; et demum, condito testamento per manus dictorum executorum, in hospitali praedicto huiusmodi pauperes et infirmos recipi ac hospitalitatem servari mandavit. Et licet tam dictus archiepiscopus adhuc vivens quam praedicti executores dictum hospitale tenuerint et in eo hospitalitatem huiusmodi aliquandiu servaverint pacifice et quiete, tamen ‥ abbatissa et conventus monasterii de Gattaiola ordinis sanctae Clarae, dictae diocesis, eosdem executores possessione dicti hospitalis et omnium bonorum eius contra iustitiam spoliari fecerunt per potentiam saecularem, dictumque hospitale Guillelmo nato Opizonis de Luca clerico de facto, cum de iure non possent, pro suae voluntatis libito contulerunt, qui praetextu collationis huiusmodi praedictum hospitale et omnia iura ipsius occupavit et adhuc ea detinet occupata; propter quod pia ipsius testatoris intentio defraudatur. Quare iidem executores nobis humiliter supplicarunt, ut eis super hiis apud sedem apostolicam faceremus exhibere iustitiae complementum.

Nos itaque negotium pauperorum et infirmorum cordi gerentes ac volentes, ut apud sedem praedictam finem debitum sortiatur, dilectum filium magistrum Symonem de Marvilla, thesaurarium ecclesiae Metensis, capellanum nostrum ac palatii nostri auditorem causarum, super hiis (quamquam negotium huiusmodi per appellationem non sit ad sedem apostolicam devolutum nec de sui natura apud sedem ipsam tractari debeat vel etiam terminari) concessimus partibus auditorem.

Quocirca discretioni tuae per apostolica scripta mandamus, quatinus easdem abbatissam et conventum ac dictum Guillelmum et omnes alios, qui sua crediderint interesse, per te vel per alium aut alios ex parte nostra peremptorie citare procures, ut infra unius mensis spatium post citationem huiusmodi cum omnibus actis, iuribus et munimentis suis negotium ipsum contingentibus per se vel per procuratores ydoneos compareant, coram nobis facturi et recepturi super praemissis, quod ordo dictaverit rationis. Diem vero huiusmodi citationis et formam, et quidquid super hiis duxeris faciendum, nobis per tuas litteras harum seriem continentes studeas fideliter intimare. Dat. Laterani, II nonas februarii, anno primo.