« bullarium-franciscanum-3187 »

BONIFACIUS &c.

Eidem.

Ecclesiarum omnium cura universalis Populi Christiani regimen ad vigilantiam Nos inducunt, Romana tamen Urbs inclyta, quam Caput Orbis Divina clementia stabilivit, & ubi Petri Sedem cælestis dispositio statuit, & firmavit, & ejusdem Urbis noster peculiaris Populus suis dignis prærogativis Nos sollicitant, & inducunt de ipsorum statu prospero, & salubri attentiùs, & diligentiùs cogitare, ut spiritualiter, & temporaliter de bono in melius recipiant incrementum; igitur de tua vita laudabili, Religione probata, scientia, & circumspectione confisi, te in Urbe præfata, auctoritate Apostolica, Vicarium nostrum duximus statuendum, tibi in spiritualibus casibus visitandi, corrigendi, & reformandi Ecclesias, & eas ac cœmeteria reconciliandi, consecrandi Altaria, necnon benedicendi, & Chrismandi, ac etiam conferendi Ordines personis idoneis de Urbe, quas tibi contigerit canonice præsentari; audiendi quoque confessiones, & imponendi salutarem pœnitentiam pro commissis potestatem plenariam concedentes. Tu itaque sicut filius benedictionis, & gratiæ hujusmodi officium humiliter, & devote suscipias, & illud secundùm prudentiam, quam tibi Dominus ministrabit, studeas exercere, ita quòd a Deo exinde præmium, nostram, & Apostolicæ Sedis gratiam, & ab hominibus bonam famam meritò consequaris. Datum ut supraa.