« bullarium-franciscanum-2807 »

NICOLAUS &c.

Dilecto filio Magistro Matthæo Canonico Assisinat. in spiritualibus Marchiæ Anconitanæ Rectori Sal. & Ap. Ben.

Significarunt Nobis dilecti filii ... Guardianus, & Conventus Domus Fratrum de Ripatransonisa Ordinis Minorum Firman.b Diœcesis, quòd Parrocchialis Ecclesia Sancti Salvatoris loci ejusdem adeo vicina, & propinqua loco, & Ecclesiæ dictorum Fratrum existit, quòd occasione vicinitatis, & propinquitatis hujusmodi dicti Guardianus, & Fratres in divinis officiis, & prædicationibus, aliisque ipsorum agendis impediuntur multipliciter, & turbantur. Quare pro parte dictorum Guardiani, & Fratrum fuit Nobis humiliter supplicatum, ut dictam Ecclesiam Sancti Salvatoris exinde amoveri, ac eam ad Ecclesiam Sanctæ Mariæ de Valle prædicti loci de Ripatransonis transferri, ejusque solum ipsis Guardiano, & Fratribus pro ampliatione loci sui concedi, cum in iis Rectores dictarum Ecclesiarum consentiant, & ea fieri cum instantia postulent, de benignitate Apostolica mandaremus. Nos itaque de circumspectione tua plenam in Domino fiduciam obtinentes discretioni tuæ per Apostolica scripta mandamus, quatenus consideratis diligenter circumstantiis universis, quæ circa præmissa fuerint attendendæ, cum de ipsorum Rectorum voluntate procedat, & si dictarum Ecclesiarum utilitati videris expedire, præfatam Ecclesiam Sancti Salvatoris cum domibus, terris, possessionibus, & omnibus bonis suis eidem Ecclesiæ Beatæ Mariæ de Valle auctoritate nostra unire, ac eam ad ipsam transferre procures, statuens ut prædicta Ecclesia Sancti Salvatoris, & Sanctæ Mariæ de Valle per duos Rectores perpetuò regantur, & etiam gubernentur, & quòd Parrocchiani ejusdem Ecclesiæ Sancti Salvatoris accedant ad ipsam Ecclesiam S. Mariæ de Valle pro audiendis divinis officiis, & recipiendis Ecclesiasticis Sacramentis, & deinde prædictam Ecclesiam S. Salvatoris demoliri faciens, Solum ejus pro ampliatione loci sui Guardiano, & Fratribus concedas eisdem, Patronorum dictarum Ecclesiarum in omnibus jure salvo, contradictores per censuram Ecclesiasticam appellatione postposita compescendo. Datum apud Urbem veterem IV. Idus Febr. Pontif. nostri Anno III.