« bullarium-franciscanum-2513 »

NICOLAUS &c.

Dilecto Filio ‥ Abbati Monasterii Fiscanen.a ad Romanam Ecclesiam nullo medio pertinentis Ordinis Sancti Benedicti Rothomagen. Diœcesis Salutem, & Apostolicam Benedictionem.

Cunctis reverendi sunt studiis, quos Summi Regis benignitas in Regnis cœlestibus collocavit, per quod dignum & consonum rationi fore dinoscitur, ut in eorum prorumpentes injurias poenâ debitâ castigentur. Sane mirantes audivimus, & referimus perturbati, quod Guillelmus de Grimovilla Rector Ecclesiæ Sancti Remigii de Dypab Rothomagen. Diœcesis propriæ salutis oblitus, & honestatis, immemor charitatis, divinâ & Apostolicæ Sedis reverentiâ prorsus abjectâ, in illum temeritatis ausum, vel veriùs mentis insaniam incidit, quòd quadam die, quæ tunc in Villa Dypæ solemnis, ut dicitur, habebatur, præsente in Ecclesia ipsa fidelium multitudine copiosa, verendamc imaginem Beati Francisci gloriosissimi Confessoris in fenestra vitrea vicina depictam torvo vultu, ac irreverenti digito demonstrando, non metuit adversus eumdem Sanctum in verba contumeliosa, & opprobriosa prorumpere, pollutis labiis verba sequentia, vel consimilia publice proferens, videlicet, ille rusticus, vilis, & maledictus Mercator cupidus extitit, Sanctus numquam; idemque Rector a tramite rectitudinis devians, & a semita exhorbitans rationis in diffamationem multiplicem Ordinis Fratrum Minorum ab eodem Sancto salubriter instituti, ac Professores illius linguam maliloquam nequiter relaxavit, alia nihilominus gravia, & enormia committendo in offensam Dei, suæ salutis dispendium, & fidelium scandalum plurimorum. Cum itaque tam nefariæ præsumptionis audaciam nolimus, sicuti nec debemus, conniventibus oculis pertransire, ne ceteris ausum committendi similia subministrent discretioni tuæ per Apostolica scripta, in virtute obedientiæ districte præcipiendo, mandamus, quatenus sublato moræ dispendio super præmissis per fide dignas personas auctoritate nostra diligenter inquiras, & si ea inveneris veritate subnixa, præfatum Guillelmum ex parte nostra peremptorie citare procures, ut infra competentem terminum a te præfigendum eidem, compareat personaliter coram Nobis pro meritis recepturus. Testes autem, qui fuerint vocati, si se gratiâ, odio, vel timore subtraxerint, censurâ simili compellas veritati testimonium perhibere. Diem verò citationis, & formam, & quidquid in hac parte feceris, Nobis per tuas litteras harum seriem continentes studeas plene ac fideliter intimare. Datum Reate septimo Kalendas Junii, Pontificatus nostri Anno Secundo.