« bullarium-franciscanum-2397 »

HONORIUS &c.

Dilecto Filio Fratri Englesioa Novarien.b Electo Sal., & Apost. Bened.

Ex susceptæ servitutis officio sollicitudine pulsamur assiduâ, ut Ecclesias spiritualibus commodis augeamus; & earum maximè per debitæ provisionis ministerium necessitatibus consulamus, quæ solatio destitutæ Pastoris diutiùs viduitatis incommoda deplorarunt. Dudum siquidem Novarien. Ecclesiâ per obitum bonæ memoriæ Singebaldic Novarien. Episcopi, Pastore vacante; Canonici ejusdem Ecclesiæ vota sua dividentes in plures, duas electiones, unam videlicet de Francisco Archidiacono ipsius Ecclesiæ, & aliam de quodam Payno Præposito Ecclesiæ S. Gaudentii Novarien. in discordiâ celebrarunt: hujusmodi ergò electionis negotio per appellationem ipsius Payni ad Sedem Apostolicam legitimè devoluto fel. record. Gregorius Papa X. d prædecessor Noster piæ memoriæ Martinum Papam e prædecessorem Nostrum tunc tituli Sanctæ Ceciliæ Præsbyterum Cardinalem in negotio ipso concessit partibus Auditoremf; sed eodem Payno post nonnullos processus in causâ ipsâ coram eodem Martino habitos naturæ debitum persolvente; dictoque Archidiacono juri, si quod sibi ex electione hujusmodi de se factâ fuerat acquisitum, in Nostris manibus renunciante liberè, ac expressè; Nos diligentiùs attendentes, quàm sit onusta dispendiis; quot, & quanta pericula secum trahat Ecclesiarum vacatio diuturna; pensantes quoque grandia tuæ probitatis merita, honestatem morum, conversationem laudabilem; aliasque virtutes, quibus personam tuam virtutum Dominus decoravit, de te Ordinis Fratrum Minorum eidem Ecclesiæ Novarien. de Fratrum Nostrorum consilio duximus providendum; teque ipsi Ecclesiæ præficimus in Episcopum, & Pastorem, curam, & administrationem illius tibi in spiritualibus, & temporalibus committentes; firmâ susceptâ fiduciâ, quòd dirigente Domino actus tuos præfata Ecclesia Novarien. per tuæ circumspectionis industriam prosperè dirigetur, & salubria, dante Domino, suscipiet incrementa. Jugum itaque Domini reverentiâ promptâ suscipias, & suavi ejus oneri sub humilitatis spiritu colla submittas præfatæ Ecclesiæ sollicitam curam gerens gregem Domini in eâ tuæ Discretioni commissum doctrinâ verbi, & operis informando; Ita quòd per tuæ diligentiæ studium Ecclesiâ ipsâ votivis proficere commodis, & optatis consurgere valeat incrementis.

Datum Romæ apud Sanctam Sabinam xvi. Kalendas Martii, Pontificatus Nostri Anno Secundo.