Général
-
Nicolas III (1277-1280)
-
Locus Fratrum de Pœnitentia J. C. Cæsaraugustæ cum primum illi desierint detur Fratribus O. M. (Ex Reges. Vatic. epist. 58. apud Waddingum ad hunc annum in Reges. Pontif. num. 7.)
-
Anno 1278. die 15. Maji.
-
1278
-
NICOLAUS &c.
Sua Nobis dilecti Filii … Guardianus, & Fratres Ordinis Minorum Cæsaraugustani petitione monstrarunt, quòd locus eorumc Civitatis Cæsaraugustanæ, ubi manent ad præsens, in quo Saracenorumd decedentium corpora consueverunt antiquitus sepeliri; ob aeris corruptionem, & intemperiem, aliasque multiplices incommoditates non solum habitationi eorumdem Fratrum ineptus, sed & ipsis perniciosus existit. Quare iidem Guardianus, & Fratres Nobis humiter supplicarunt, ut cum in loco Fratrum, qui de Pœnitentia Jesu Christie dicuntur, Civitatis prætactæ; quorum Ordo non est de reservatis per Constitutionem fel. record. Gregorii Papa X. prædecessoris Nostri super hoc editam in Concilio Lugdunensif, in quo dudum viginti Fratres, & plures etiam ipsius Ordinis de Pœnitentia Jesu Christi manere consueverant, perpauci commorentur ad præsens; propter quod est verisimiliter præsumendum, quòd post non magni temporis spatium locus ipse juxta tenorem prædictæ Constitutionisg dispositioni Sedis Apostolicæ relinquitur; ipsis Guardiano, & Fratribus Minoribus locum ipsum cum pertinentiis suis obtinendum ab eis, cum illum Fratres dicti Ordinis de Pœnitentia Jesu Christi deseruerint, concedere dignaremur. Nos igitur, qui dictum Ordinem Fratrum Minorum, ejusque professores sincerâ in Domino diligimus charitate; volentes eisdem Guardiano, & Fratribus in hac parte gratiam facere specialem Fraternitati tuæ per Apostolica scripta mandamus, quatenus præfatum locum prædictorum Fratrum de Pœnitentia Jesu Christi cum juribus, & pertinentiis suis eisdem Guardiano, & Fratribus ex nunc auctoritate Nostrâ per Te, vel per alium juxta infrascriptam formam inhabitandum ab eis liberè conferas, & assignes. Volumus etenim, quòd si præfati Fratres de Pœnitentia Jesu Christi sive simul omnes sive singulariter se transferre voluerint ad prædictum Ordinem Fratrum Minorum, vel alium, seu alios Ordines approbatos; super quo eis, prædictâ Constitutione nequaquam obstante, auctoritate Nostrâ licentiam largiaris; eosdem Guardianum, & Fratres Minores ex tunc, alioquin quàm cito præfatum locum ab eodem Ordine Fratrum de Pœnitentia Jesu Christi prædicto modo, vel aliàs contigerit derelinqui, sicque secundum constitutionem eamdem in dispositione Sedis remanere prætactæ, in corporalem possessionem ipsius loci, jurium, & pertinentiarum ejus pro ipsorum inhabitatione per Te, vel per alium inducash, & defendas inductos. Contradictores per censuram Ecclesiasticam appellatione postpositâ compescendo. Non obstante, si aliquibus &c.
Datum Romæ apud Sanctum Petrum, Idibus Maji, Pontificatus Nostri Anno Primo.
-
Bullarium Franciscanum romanorum pontificum, tomus III, n°XXVIII., p.305
-
(a) Ven. Fratri …: Hugoni, qui anno 1287. obiit Romæ apud Aram-Cæli sepultus, ejusque ossa anno 1295. Cæsaraugustam translata a Fr. Romæo Ministro Prov. Aragoniæ reposita sunt ad Aram majorem ex Waddingo n. 37.
-
(b) Cæsaraugustano: Aragoniæ Civitatis primariæ, olimque Regum Aragoniæ Sedis tunc sub Toletano Archiepiscopo, postea in Metropolim erectæ.
-
(c) Locus eorum: Caput erat Custodiæ sui nominis in Provincia Aragoniæ ex distributione Provinciarum & Custodiarum Ordinis anno 1260. Narbonæ in Comitiis Gener. facta a S. Bonaventura.
-
(d) Saracenorum: Quibus a Christianis Civitas erepta est anno 1118.
-
(e) De Pœnitentia Jesu Christi: Pro quo Ordine vide 1. hujus Operis tomum fol. 31, & 83.
-
(f) Editam in Concilio Lugdunen.: Anno 1274. cap. 23., vulgatamque in Bulla Gregorii X. Unam ex consultationibus &c. anno 1275. die 31. Martii supra fol. 226.
-
(g) Constitutionis: Qua Religionum supprimendarum alumnis præcipiebatur, ut nullum deinceps ad eorum professionem admitterent; ideoque quamprimum extinguendis.
-
(h) Inducas: Quod contigit anno 1286. ad situm optimum in meditullio Civitatis, & veneranda olim Martyrum carnificina, inquit cit. Waddingus ad hunc annum n. 37., ubi fuse locum describit.