« bullarium-franciscanum-2082 »

NICOLAUS ELECTUS EPISCOPUS &c.

Dilectis Filiis Fratribus Johannia Magistro Prædicatorum, & Hieronymob Ministro Minorum Ordinum Generalibus Salutem, & Apostolicam Benedictionem.

Vocatis Nobis, licèt insufficientibus meritis, ad Apostolatus Officium, occurrit quasi confestim considerationis Nostræ conspectui acerbis infesta molestiis periculosa dissensio, quam inter Carïssimos in Christo Filios Nostros Franciæ, & Castellæ Regesc Illustres incentor malorum omnium suscitavitd, amaras Nobis suas circumstantias, quas frequenter, dum Nos minor status haberet, intra pectoris claustra revocavimus, repræsentans. Hinc enim Nostris se offerebant obtutibus impedimentum proinde facilè receptura pia Dei negotia, & præcipuè Terræ Sanctæ: hinc se animarum pericula; Christiani sanguinis non quævis effusio; gravia rerum dispendia; & non solùm eorumdem Regum, suarumque Gentium, sed & totius quasi Christianitatis in ipsorum commotione damnosa turbatio ingerebant. Hæc quidem Nostri cordis intima stimulant; acutisque stimulis instanter Nostrum officium interpellant, ut ad occurrendum tanto Religionis Christianæ discrimini per opportuna remedia ocyus exsurgamus. Considerantes itaque, quòd cum ad Prælatos omnes, & Episcopos maximè spectare noscatur in Diœcesibus propriis exhortationibus priùs, & tandem suæ Jurisdictionis, ac potestatis vigore ad concordiam revocare discordes; multò magis ad Nos, qui licèt immeriti potestatis plenitudine fungimur, Apostolorum Principi, suisque Successoribus ex alto concessæ, singulariter pertinet in universali Ecclesiâ, cunctâve congregatione Fidelium pacem quærere; ac ipsam facere diligentiùs observari. Et attendentes insuper, quòd in Lugdunen. Concilioe in favorem negotii Terræ prædictæ providâ fuit deliberatione statutum; ut in toto Orbe Terrarum inter Principes præcipuè, ac alios Christianos pax generaliter observetur; Itaque quòd per Ecclesiarum Prælatos discordantes reducantur ad pacem, vel firmam treugam certi temporis spatio inviolabiliter observandam, & acquiescere contemnentes per excommunicationis in personas, & in terras ipsorum interdicti sententias compellantur; Nostri circa hoc partes officii censuimus exequendas; & vobis quos ad tantæ utilitatis opus fervore confidimus; & nequaquam ad eorumdem Regum statum pacificum affici dubitamus executionem hujusmodi deliberavimus committendamf. Ideoque Discretionem vestram rogamus, monemus, & hortamur attentè, vobis de Fratrum Nostrorum consilio per Apostolica scripta mandantes, quatenus Reges eosdem, & Gentes ipsorum non tantùm ab omni congressu bellico, & invasione, seu insultu alterutrius in alterum, aut in terras, vel bona cujuslibet eorumdem, seu ad ipsorum quemvis spectantia quoquo jure immo etiam a præparatione seu dispositione quâlibet ad præmissa, & invocatione quâvis circa ea, occasione quorum est exorta dissensio inter eos, per excommunicationis in personas, & interdicti sententias in terras eorum; non obstante quâlibet indulgentiâ Regibus ipsis, vel eorum alteri, seu cuilibet alii, sub quâcumque verborum formâ, vel expressione ab Apostolicâ Sede concessâ, quando, & prout secundum Deum expedire videritis, auctoritate Apostolicâ per vos, vel per alios, seu alium compescatis; nihilominus pervigili studio, & instantiâ indefessâ pacis, & concordiæ reformandæ inter Reges eosdem cæpto vacaturi tractatui; & causas, ac modos, per quos id obtinere efficaciùs posse putabitis, Nobiscum, quantâ celeritate poteritis, seriosiùs rescripturi; cum Nostri sit omnino propositi sic Nos hujusmodi conferre negotio, sic curiosas, sic solertes circa illud curas impendere, ac omni, qua poterimus diligentiâ providere, quòd satis inter Reges ipsos hactenus zizaniis radicitùs extirpatis, discordiâque sublatâ, ac extincto discordiæ incentivo, pacis, & concordiæ, Nostris admodum votis accommodæ, mundoque perutilis, redintegratio solida inter eos celeriter, Deo auspice, subsequatur. Nec mireminig &c.

Datum, ut suprah.