« bullarium-franciscanum-1799 »

CLEMENS &c.

Dilecto Filio Fratri Bonaventuræ Ministro Generalia Ordinis Fratrum Minorum Electo Eboracen.b Salutem, & Apostolicam Benedictionem.

Summo Pastori Jesu Christi Vicario generali sollicitudine super omnes Ecclesias incumbente, in eo præcipuè Nos, qui ad ferendum tanti onus officii licet indigni dignatione Divina sumus assumpti, teneri cognoscimus; ut circa provisionem Ecclesiarum ipsarum, cum fuerint de Pastoribus ordinandæ, maximo vigilemus; & nostro attento studio personæ idoneæ, ac utiles animarum regimini præponantur, quæ meritorum claritate Deo amabiles, & acceptæ, proficientes sibi per vitæ honestatem; & subditis per exempla salubria procurent omnimoda diligentia commissarum sibi Ecclesiarum in spiritualibus, & temporalibus incrementa. Vacante igitur Eboracen. Ecclesia per mortem bonæ memoriæ ‥c Eboracen. Archiepiscopi; & electione, quæ de dilecto Filio ejusdem Ecclesiæ Decano in ipsa celebrata extitit, justitia per Nos exigente cassata; Nobisque hac vice ipsius Ecclesiæ provisione retenta, diù super eam vigilavimus; diù super eam sedulis, & profundis cogitationibus defiximus mentem nostram; diù ob ipsam nostrum spiritum prospectus varii distraxerunt. Nam pro tam magna, & honorabili Ecclesia, pro tam nobili, & devota Sedis Apostolicæ filia, & pro inclyto, & Catholico Regno Angliæ ipsi Sedi carissimo, ubi eadem Ecclesia opibus amplis prædita refulget Archiepiscopalis eminentia dignitatis, ampliori sollicitudine urgebamur. Exacuerunt hæc in Nobis curam, accenderunt vigilantiam, cogitatum auxerunt, ut meditaremur vehementius, & diligentius attenderemus, quid ipsi Ecclesiæ, quid dictæ Sedi, quid eidem Regno in facienda provisione hujusmodi potius expediret, aspirantes totis affectibus, & sollicitis studiis intendentes ad virum dilectum, & devotum Sedis ejusdem, Ecclesiæ præfatæ utilem, & ipsius Regni pacis, & concordiæ amatorem; ad virum vita conspicuum, insignem scientia, providentia spectabilem, quem diligeret Dominus, & in cujus requiesceret bonitate; ad virum pro suis claris operibus digna imitatione sequendum; per quem Grex Catholicus tamquam per lucis speculum convenienter posset dirigi ad salutem. Unde nostra in his desideria totaliter convertentes ad Dominum, & hujusmodi provisionis negotium ejus beneplacito committentes, ac sub spe solius suæ gratiæ fidenter procedentes, de illo habito tractatu super hoc cum Fratribus nostris, de ipsorum consilio ad te direximus nostræ considerationis intuitum; in te vita nostra firmavimus; in te noster spiritus plena deliberatione quievit. Attendentes itaque in te Religionis asperitatem, nitorem vitæ, conversationis munditiam, eminentiam scientiæ, providentiæ circumspectionem, & compositionem gravitatis, & quod tam diùd, tam laudabiliter toti tuo præfuisti Ordini susceptum generale ministerium super illum gerendo fideliter, & prudenter, & salubriter exequendo ad magnum honorem ipsius Ordinis, & profectum; quodque sic innocenter conversari assiduè studuisti sub observantia regulari; quod Divina te semper gratia prosequente reddidisti te placidum, & amabilem quasi omnibus, & ubiquee; ac propter hoc sperantes firmiter, quod pleno in te prosequemur affectu, id quod circa prætactam Ecclesiam, Sedem eamdem, & ipsum Regnum in hac ejusdem Ecclesiæ ordinatione avidè affectamus; de persona tua ipsi Ecclesiæ auctoritate Apostolica providemus, & te illi præficimus in Archiepiscopum, & Pastorem, absolventes te a vinculo Ministerii Generalis præfati Ordinis, & ad dictam Ecclesiam transferentes liberam tibi transeundi ad illam licentiam concedendo. Ideoque prudentiam tuam monemus, & hortamur attentè, & affectuosè rogamus, tibique in virtute obedientiæ districtè præcipimus, & in remissionem injungimus peccatorum, quatenus ejusdem Ecclesiæ necessitatem, honorem, & commodum dictæ Sedis, & statum præfati Regni validè his diebus tempestate turbatumf, & intestina vexatione divulsum; propter quod proborum virorum potentia indiget, quorum diligentia, & studio reparetur, solidè, ac integre reformetur; solerter considerans, & sapienter advertens Divinis in hoc beneplacitis aliquatenus non repugnes; nostrisque jussionibus difficultatis, seu tarditatis obstaculum penitus non opponas; sed vocationi cælesti humiliter acquiescas; & de superno, ac nostro cofisus auxilio reverenter, & devotè suscipias impositum a Domino tibi onus regendo, & dirigendo juxta datam tibi ab ipso gratiam prædictam Ecclesiam, & in spiritualibus, & temporalibus ampliando; ita quod exindè grande præmium apud Deum, & penes nos uberioris favoris beneficia merearisg.

Datum Perusii viii. Kalendas Decembris, Pontificatus Nostri Anno Primoh.