Général
-
Urbain IV (1261-1264)
-
Monasterio S. Mariæ de Plano Abbatem præfici committit cum consilio Rectoris Ducatus Spoletani, & Marchiæ Anconitanæ. (Ex Vatic. Reges. Pontif. ep. 1322. to. 4. an. 3.)
-
Anno 1263. die 1. Decembris.
-
1263
-
URBANUS &c.
Venerabili Fratri ...a Episcopo Esino Salutem, & Apostol. Benedictionem.
Cum, sicut per tuas Nobis litteras intimasti, Monasterium Sanctæ Mariæ de Planob tuæ Diœcesis Ordinis Sancti Benedicti tibi subjectum, quondam ... Abbate ipsius viam universæ carnis ingresso, pastore vacet ad præsens; Nos nolentes, ut idem Monasterium ex vacatione diutina gravia in spiritualibus & temporalibus subeat detrimenta; Fraternitati tuæ mandamus, quatenus solum Deum habens præ oculis aliquam personam idoneam, & Ecclesiæ Romanæ devotam, quæ tanto congruat oneri, & honori, aut consilio dilecti filii Manfredi Veronen. Electic, Capitanei, & Rectoris Ducatus Spoletani, Marchiæ Anconit. dicto Monasterio auctoritate nostra in Abbatem præficias & Pastorem, faciens illi, de quo eidem Monasterio taliter providendum duxeris, a Conventu ipsius Monasterii tamquam Patri & Pastori animarum suarum obedientiam, & reverentiam debitam exhiberi; eique munus benedictionis impendasd. Contradictores per censuram Ecclesiasticam appellatione postposita compescendo.
Datum apud Urbem veterem Kalen. Decembris, Pontific. Nostri Anno iii.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CXI., pp.529-530
-
(a) Ven. Fratri ...: Bonajunctæ ex Ordine Min. hoc anno idibus Octobris e Recineten. ad Æsinam Ecclesiam translato ex ep. 95. Debitum nostri &c. ibi relata.
-
(b) S. Mariæ de Plano: Cujus in Annal. Bened. nulla legitur mentio; Ughellus vero in tom. 1. Italiæ Sac. bina Monasteria Ord. S. Benedicti Æsinæ Diœcesis memorat S. Mariæ Molearum a Nicolao V. Capitulo Æsinæ Ecclesiæ unitum pro vita communi Canonicorum; & alterum S. Benedicti in Colle Castri Plani, quo Episcopi recreandi animi causa se conferunt.
-
(c) Veronen. Electi: De Robertis familia illustri Regiensi ab Alexandro IV. anno 1261. promoti, de quo plura Ughellus to. 5. Ital. Sac.
-
(d) Munus benedictionis impendas: Abbates enim, & Abbatissæ Pontificali benedictione sunt muniendi ex Canon. sanctionibus.