« bullarium-franciscanum-916 »

INNOCENTIUS &c.

Dilectis Filiis Fratribus Ordinis Prædicatorum a Inquisitoribus hæreticæ pravitatis in Italia Salutem & Apostolicam Benedictionem.

Ad audientiam nostram, significantibus dilectis Filiis Guidone de Sexto, & Raynerio de Placentia Fratribus Ordinis Prædicatorum Inquisitoribus hæreticæ pravitatis in Civitate, & Diœcesi Mediolanensi, noveritis pervenisse, quod iidem, dudum intellecto, quod Manfredus de Sexto civis Mediolanen. diabolica fraude seductus, ac perfidiæ tenebris involutus veram, & Catholicam Fidem hæreticæ detractionis morsibus impetebat, ipsum juxta formam eis a nobis traditam publice citari fecerunt, quod in præfixo sibi ab eis termino peremptorio in eorum præsentia compareret mandatis Ecclesiæ super præmissis pariturus. Verum quia idem civis in eorum præsentia constitutus confessus fuit in judicio coram eis, quod a longe retroactis temporibus fuerat credensb, receptator, defensor, & fautor hæreticorum; quodque interfuerat tractatui necis bonæ memoriæ Fratris Petri de Arcaniacoc Ordinis Minorum in favorem hæreticorum, & inimicorum Fidei Orthodoxæ; & quod quandam pecuniæ quantitatem collegerat, & dederat quibusdam malefactoribus, qui dictum Fratrem ad ipsorum hæreticornm instantiam peremerunt; & quod etiam eo procurante undecim hæretici furtive de carceribus evaserunt: dicti Fratres injunxerunt eidem; ut personaliter Apostolico se conspectui præsentaret recepturus condignam pœnitentiam pro commissis: sed præfatus Manfredus, utpote quem reatus conscientiæ accusabat, de Apostolicæ Sedis desperans misericordia fugam arripuit, mandato ipsorum penitus obauditod; propter quod memorati Fratres ipsum tanquam hæreticum reputantes sententialiter decreverunt, eum promulgatis adversus hæreticos sanctionibus subjacere. Unde dilectos filios nobiles viros universos Marchiones, Comites, Barones, necnon Potestates, Rectores, Consules Civitatum, Castrorum, & aliorum Locorum per Italiam constitutos rogandos duximus attentius, & monendos, nostris eis dantes districte literis in mandatis, ut eumdem civem, & bona sua; si ipsum ad loca eorum jurisdictioni subjecta venire contigerit, capere, ac detinere procurent. Quocirca discretioni vestræ per Apostolica scripta mandamus; quatenus, si prædicti Nobiles, & alii mandatum nostrum neglexerint adimplere; vos, vel quilibet vestrum eos ad id, monitione præmissa, per censuram Ecclesiasticam, appellatione postposita, compellatis: non obstante, si eis vel eorum alicui a Sede Apostolica sit indultum, quod excommunicari non possint per litteras Apostolicas plenam, & expressam non facientes de indulto hujusmodi mentionem.

Datum Laterani Nonis Aprilis Pontificatus Nostri Anno Undecimo.