« bullarium-franciscanum-912 »

INNOCENTIUS &c.

Dilectis Filiis Ministro a , & Custodibus b , vel eorum Vicariis Ordinis Fratrum Minorum administrationis Urbis c Salutem, & Apostolicam Benedictionem.

Quia tunc potissime acceptabile Jesu Christo exhibetur obsequium, cum ei pro Catholicæ Fidei conservatione, cujus est ipse stabile, & perpetuum fundamentum, pura intentione servitur; providimus specialiter in hoc ipsi studiosum, & placidum eo cooperante impendere famulatum; & præcipue in Urbe, in Patrimonio Beati Petri, & aliis terris Ecclesiæ, Regno, Apulia, Lombardiad, Romaniola, Marchia Tarvisina, ac in Tuscia; circa quas debemus sollicitius vigilare, instantius, & validius satagere contra ejusdem Fidei diros hostes, ut cultura salubris per Nos agris Dominicis impensa vicinis utilis sit longinquius, & Verbi Divini semen fusum in proximis fructificet etiam in remotis; licet Sedes Apostolica tales hostes undique indefessa sollicitudine persequatur, nec unquam ab hujusmodi exercitio cessaverit cura ejus. Convenit namque, ut quia Inquisitores contra pestem hæreticam roborare, ac renovare per diversas seculi volumus regiones; id agere in Urbe, ac terris aliis supradictis majori opportunitate nunc habita, nullatenus omittamus; cum quanto propius nostris adsunt aspectibus, tanto justius, nisi attente saluti prospiceremus ipsorum, possemus argui de negligentia. Ideoque discretioni vestræ per Apostolica Scripta districte præcipiendo mandamus in remissionem vobis peccaminum injungentes; quatenus tam per vos, quam per alios idoneos Fratres vestræ curæ commissos, quibus negotium hujusmodi, quod principaliter nostro residet cordi, auctoritate nostra duxeritis committendum, totis assumentes affectibus, & ferventibus animis prosequentes ad exstirpandam de Provincia tuæ, Fili Minister, curæ commissa pravitatem hæreticam sollicite, & efficaciter laborantes, si quos ibi de pravitate ipsa culpabiles inveneritis, vel infectos, seu etiam infamatos, nisi examinati velint absolute mandatis Ecclesiæ obedire; contra ipsos, & receptatores, defensores, ac fautores eorum, humano amore postposito, juxta Sanctiones Canonicas, auctoritate Apostolica procedatis; invocato contra eos ad hoc, si opus fuerit, auxilio brachii secularis. Contradictores per Censuram Ecclesiasticam, appellatione postposita, compescendo. Si vero aliqui, hæretica labe penitus abjurata redire voluerint ad Ecclesiasticam unitatem, eis juxta formam Ecclesiæ absolutionis beneficium impendentes injungetis eisdem, quod talibus injungi convenit. Proviso solerter, ne simulata conversione redeant fraudolenter; & vos, imo potius se fallentes sub Agni specie gerant lupum. Quod si fortè (quod non credimus) aliqui cujuscumque conditionis huic negotio se opponere, seu illud præsumpserint aliquatenus impedire; ut non possit per vos procedi liberè in eodem; imò nisi foverint illud, & juverint studiosè; contra eos secundum Sanctiones Canonicas eadem auctoritate libere procedatis. Ut autem prædicta possitis utilius, & liberius exercere; vobis largiendi viginti, vel quadraginta dierum indulgentiam, quoties opportunum videritis, omnibus verè pœnitentibus, & confessis, qui ad vestram prædicationem propter hoc faciendam accesserint, plenam tenore præsentium concedimus potestatem. Illis vero, qui ad impugnandum hæreticos, fautores, & receptatores, ac defensores eorum vobis ex animo auxilium, consilium præstiterint, vel favorem; de Omnipotentis Dei misericordia, & Beatorum Petri, & Pauli Apostolorum ejus auctoritate confisi tres annos de injuncta sibi pœnitentia relaxamus. Et si qui ex iis ad prosecutionem hujusmodi negotii contra prædictos hæreticos, fautores, receptatores, vel etiam defensores personaliter iverint, eis peccatorum omnium, de quibus corde contriti, & ore confessi fuerint, plenam veniam indulgemus. Compescendi quoque, monitione præmissa per Censuram Ecclesiasticam, appellatione postposita, Prædicatores quæstuarios; quorum interest tantum caritativa subsidia simpliciter petere, ac indulgentiam (si quam fortè habent) exponere; a prædicationis officio, quod ad ipsos nullatenus pertinet, liberam vobis tribuimus facultatem. Quod si simul iis non interfueritis, unus vestrum ea nihilominus exequatur.

Datum Laterani v. Kalend. Aprilis Pontificatus Nostri Anno Undecimo.