« bullarium-franciscanum-410 »

INNOCENTIUS &c.

Dilectis in Christo Filiabus Abbatissæ, & Conventui Monialium inclusarum Monasterii S. Spiritus Ordinis S. Damiani Civitatensis a Diœcesis Salutem, & Apostolicam Benedictionem.

Cum a Nobis petitur, quod justum est, & honestum, tam vigor æquitatis, quam ordo exigit rationis, ut id per sollicitudinem officii nostri ad debitum perducatur effectum. Exhibita siquidem Nobis vestra petitio continebat, quod Vener. Frater noster Michael Civitatensis Episcopus, Capituli sui accedente consensu, Monasterium Sancti Spiritus, in quo Divino vacatis obsequio, duxit ab Episcopali jure in spiritualibus, & temporalibus eximendum, in eo sibi, & Ecclesiæ Civitatensi unius libræ ceræ censu annuo, & quibusdam aliis reservatis; prout in ipsius Episcopi litteris confectis exindè pleniùs continetur. Nos igitur vestris justis precibus inclinati, quod per eumdem piè, ac providè factum est, ratum, & gratum habentes, id auctoritate Apostolica confirmamus, & præsentis Scripti patrocinio communimus. Ad hujus itaque perpetuam firmitatem tenorem ipsarum litterarum præsentibus fecimus annotari, qui talis est.

“Michael Dei miseratione Civitaten. Episcopus. Dilectis in Christo Filiabus … Abbatissæ, & Monialibus inclusis Ordinis Sancti Damiani Assisinatensis Monasterii Sancti Spiritus Civitatensis positi in Suburbio salutem, & benedictionem in Domino Jesu Christo. Justis petentium desideriis dignum est nos facilem præbere assensum; & vota, quæ a rationis tramite non discordant, effectu prosequente complere. Eapropter, dilectæ in Christo Filiæ nostræ, piæ, ac humili petitioni vestræ pio, ac benevolo concurrentes assensu, de conscientia piissimi Patris nostri Domini Gregorii Papæ IX., & de consensu, ac spontanea voluntate totius Capituli nostri prætactum Monasterium cum omnibus, quæ nunc possidet, & quæ auxiliante Domino poterit adipisci, & personas nunc ibidem commorantes, vel quæ illuc imposterum sunt venturæ, ob reverentiam Divinam, & Apostolicæ Sedis, cujus vos scimus Filias speciales, ab omni Episcopali jure, & cujuslibet conditionis obligatione tam in temporalibus, quam in spiritualibus prorsus eximimus, Nobis, & Ecclesiæ Civitatensi non aliud in eisdem, nisi unam libram ceræ pro temporalibus Nobis, & nostris Successoribus in Assumptione Beatæ Virginis Mariæ annis singulis persolvendam; Dedicationem Ecclesiæ; & Altarium consecrationes; benedictionem Monialium, & cetera Ecclesiastica Sacramenta; & Interdictum generale pro spiritualibus reservantes: Si tamen Nos, & Successores nostri, cum a vobis fuerimus requisiti, ea gratis, & sine pravitate aliqua vobis, & eis, quæ vobis successerint, voluerimus exhibere; alioquin liceat vobis hæc eadem recipere a quocumque Catholico Episcopo gratiam, & communionem Apostolicæ Sedis habente. Remittimus etiam vobis partem mortuariorum, seu vobis relictorum Nobis jure aliquo competentem in nostrarum, & Successorum nostrorum remedio animarum. Ut autem factum nostrum perpetuæ robur obtineat firmitatis, sigilli nostri, & Capituli Ecclesiæ nostræ in perpetuum testimonium munimine roboramus. Datum apud Civitatem Rodericib Era Mcclxxviii. c ii. Kalendas Maii.” Nulli ergo omnino hominum liceat hanc paginam nostræ confirmationis infringere, vel ei ausu &c.

Datum Laterani xv. Kalendas Maii Pontificatus nostri Anno Primod.