Général
-
Grégoire IX (1227-1241)
-
Indulgentias elargitur singulis annis visitantibus processionaliter in vigilia Assumptionis B. Virginis earum Monasterium devotionis causa. (Ex Monumentis ejusdem Monasterii Sanctæ Mariæ de Monte Lucio Perusin.)
-
Anno 1235. die 1. Septembris.
-
1235
-
GREGORIUS &c.
Dilectis in Christo filiabus Abbatissæ, & Sororibus inclusis Monasterii Sanctæ Mariæ de Monte Lucio Perusin. a Salutem, & Apostolicam Benedictionem.
Si quibuslibet piis locis honor est ob Sanctorum memoriam impendendus, illis profectò debet major honorificentia, & cultus celebrior exhiberi, quæ in honore Beatæ Virginis Domini nostri Matris pia sunt devotione Fidelium dedicata, cum impensam Matri reverentiam sibi reputet Filius exhiberi; & ipsa in mulieribus benedicta, Mater pulchræ dilectionis, & timoris, & sanctæ spei jugiter interpellet pro miseris; pro afflictis supplicet, & pro peccatoribus intercedat. Cum igitur dudum inspiratione Divina prævia fuerit ordinatum, ut in vigilia Assumptionis ejusdem Monasterium vestrum annis singulis a Clericis, & Laicis processionaliter visitetur; & dilecti filii Mercatores, & Ministri artium Perusini inter ceteros accedant illuc venerabiliter, & devotè: Nos volentes ea, quæ ad ampliandum cultum Divini Nominis ab aliquibus laudabiliter ordinantur, inviolabiliter observari; & ne a quoquam temerè violetur; favoris nostri præsidio communiri ordinationem ipsam pia providentia, & provida pietate factam auctoritate Apostolica confirmamus, & præsentis Scripti patrocinio communimus. Ut autem hujusmodi ordinatio devotiùs observetur, & observantes reddantur Divinæ gratiæ aptiores, ac alii ad devotionem ipsius Monasterii accendantur, & dictum Monasterium congruis honoribus frequentetur; omnibus verè pœnitentibus, & confessis, qui ipsum in eadem vigilia processionaliter devotione congrua visitaverint, de omnipotentis Dei misericordia, & Beatorum Petri, & Pauli Apostolorum ejus auctoritate confisi annum unum de injuncta sibi pœnitentia misericorditer relaxamus.
Datum Perusii Kalendis Septembris Pontificatus Nostri Anno Nono.
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°CLXXXIII., p.177
-
(a) Monasterii S. Mariæ de Monte Lucio Perusin.: Cujus mentio facta est in superioribus Bullis Honorii iii. Sacrosuncta Romana Ecclesia &c. anno 1222. die 24. Septembr., aliisque hujus Pontificis anno isto 1235. die 7. Martii, & 25 Augusti editis; annoque 1237. dieb. 30. Martii, & 24. Maji.