Général
-
Grégoire IX (1227-1241)
-
Certiorem eum facit de inita tandem pace inter Ecclesiam Romanam, & Fridericum Imper. rogandumque Deum adjiciens, ut pacem continuare, ac confirmare velit. (Ex Regesto Vatic. Epist. 166. lib. 4. apud Raynaldum Annal. Eccles. ad hunc ann. n. 13.)
-
Anno 1230. die 28. Augusti.
-
1230
-
GREGORIUS &c.
Charissimo in Christo filio Illustri Regi Francorum a Salutem, & Apostolicam Benedictionem.
Tandem magnificans Dominus facere nobiscum, magnificans Dominus cum illis, quare facti sumus lætantes, multorum, ut confidimus, orationibus inclinatus humiliavit cor Principisb, & ad Matris gremium revocavit; dum mediantibus Principibus Alemanniæ tam Ecclesiasticis, quam sæcularibus, tractatu pacis præhabito, & ab utraque parte communiter acceptato, idem ad mandatum Ecclesiæ rediens humiliter, & devotè, absolutionis beneficium meruit obtinere; alias Dei, & Ecclesiæ beneplacitis hilariter se offerendoc. Unde cum post nubilum gratius sit serenum, & gaudium acceptius post dolorem; Mater Ecclesia in tanti receptione filii merito jucundata gratias agit ei, qui non in turbine, nec in igne, sed in sibilo auræ tenuis apparere dignatus pacem hominibus bonæ voluntatis reddidit salutarem. Verum quia commune pacis bonum gaudium debet esse commune, quod cunctorum desideriis fuerat expetendum; celsitudinem Regiam rogamus, monemus, & hortamur in Domino, quatenus magnificans Dominum ex corde nobiscum, suppliciter postules ab eodem, ut pacem continuet, & confirmet; alias pro conservatione pacisd cooperari modis, quibus poteris, non desistas; ita quod propitiationem Divinam ex hoc uberius merearis, & nos sinceritatem tuam possimus merito commendare.
Datum ......e
-
Bullarium Franciscanum romanorum pontificum, tomus I ab Honorio III ad Innocentium IIII, Rome, 1759, n°LV., pp.67-68
-
(a) Regi Francorum: S. Ludovico IX., de quo supra dictum est.
-
(b) Cor Principis: Friderici ii. Imp., qui & ab Honorio iii., & a Gregorio censura Eccles. innodatus fuerat ob ea, quæ satis sunt nota.
-
(c) Se offerendo: Hujus pacis tractatum, conditiones, & epistolas utriusque partis legimus in Annal. Eccles. Raynaldi ad hunc annum num. 1. & seqq.
-
(d) Conservatione pacis: Quæ obtineri non potuit etiam Sanctorum virorum orationibus; ea fuit illorum temporum malignitas, & partis adversæ protervia.
-
(e) Datum…: Subde Anagniæ v. Kalend. Septembr. Pontificatus Nostri Anno iv., quo die litteras dedit etiam Friderico Imp. gratulationis pro pace tandem composita apud cit. Raynaldum num. 12., unde conjicimus, aut eodem tempore, aut circiter ad S. quoque Ludovicum litteras has scripsisse.