Général
-
Innocent VI (1352-1362)
-
L'archevêque de Tours, l'évéque de Luçon et l'abbé de Saint-Aubin d'Angers
-
II nonas augusti, anno tertio
-
-
Avignon
-
Lettre, général (après 1198, littere cum filo canapis)
-
[Registre de la chancellerie apostolique] R. CITÉ DU VATICAN, Archivio segreto Vaticano, Registra Avinionensia 129, fol. 482v.
-
Ici reprise de Guillaume Mollat, « Etudes et documents sur l'histoire de Bretagne, XIIIe-XVIe siècle », Annales de Bretagne et des pays de l'Ouest, 25-1, 1909, p. 152-172, aux p. 165-168 [en ligne]
-
Innocent VI invite l'archevêque de Tours, l'évéque de Luçon et l'abbé de Saint-Aubin d'Angers à procurer la liberté à Jean de Tréal, maltraité et retenu prisonnier au château d'Elven, au diocèse de Vannes, par Thomas de Horlande et Tkomelin Fouques, l'un chevalier du diocèse d'York et l'autre damoiseau du diocèse de Londres, qui l'ont obligé à promettre une rançon de 10,000 écus.
-
Venerabilibus fratribus … archiepiscopo Turonensi et .. episcopo Lucionensi, ac dilecto filio .. abbati monasterii Sancti Albini Andegavensis, salutem, etc.
Nuper ad apostolatus nostri, non sine gravi molestia, pervenit auditum quod nonnulli iniquitatis filii, a quorum oculis Dei timor prorsus abscessit, dilectum filium Joannem, abbatem monasterii de Rothono, ad Romanam Ecclesiam nullo medio pertinentis, ordinis sancti Benedicti, Venetensis diocesis, ausu sacrilego, non absque manuum injectione in eum temere violenta, capere extra dictum monasterium, ad diversa loca adducere, adductum carceri et diris vinculis ferreis mancipare, et diutius detinere, sevis tormentis subicere, verberibus cedere et graviter vulnerare, et insuper ad promittendum eisdem pro redemptione sua decem milia scudatorum auri, ex quibus tria milia et quingentos scudatos jam persolvit eisdem necnon certam alterius pecunie summam diebus persolvendam singulis et ad prestandum de hiis adimplendis nichilominus juramentum per vim et metum, qui cadere poterat inconstantem crudelibus persone afflictionibus cohercere temere presumpserint et nichilominus Thomas de Horlande, miles, et Thomelinus Pouques, domicellus Eboracensis et Londoniensis diocesium, ac nonnulli alii eorum complices dictum abbatem in castro de Elven, predicte Venetensis diocesis, adhuc detinent miserabiliter captivatum in gravem divine majestatis offensam, apostolice sedis contemptum, suarum animarum periculum dictique monasterii detrimentum et scandalum plurimorum. Nos igitur, attendentes quod non decet nec expedit hujusmodi sacrilegia et tam enormes excessus absque animaversione debita relinquere incorrecta, discretioni vestre per apostolica scripta committimus et mandamus quatinus vos, vel duo, aut unus vestrum, per vos, vel alium, seu alios, omnes et singulos clericos et laicos hujusmodi sacrilegii et excessuum patratores, necnon eos qui predicta fieri mandarunt seu fecerunt, aut eorum nomine vel mandato facta rata habuerunt, generaliter per omnes ecclesias et loca in quibus expedire videbitis excommunicatos publice nuncietis et faciatis ab aliis nunciari, et nichilominus de predictis omnibus et singulis ea tangentibus auctoritate nostra, simpliciter et de piano, sine strepitu et figura judicii, solerti et fideli adhibita diligentia, tam in vestris civitatibus et diocesibus quam locis aliis, de quibus expedire videritis, vos informetis, et tam predictos Thomam et Thomelinum, si eos, quam omnes et singulos alios tam clericos, quam laicos cujuscumque preminentie aut dignitatis, ordinis, status vel condictionis existant, quos per informationem hujusmodi repereritis commisisse, aut committi fecisse vel mandasse sacrilegium et excessus predicta, seu eorum nomine vel mandato commissa rata habuisse, nominatim tam diu excommunicatos diebus dominicis et festivis, pulsatis campanis et candelis accensis, in eisdem ecclesiis atque locis, cum major in eis cleri et populi fuerit multitudo, publice nuncietis et per alios nunciari faciatis, et ab omnibus arcius evitari, donec predictum abbatem realiter et cum effectu pristine libertati restituerint, aut quantum in eis fuerit restitui fecerint et etiam procurarint, et alias de premissis satisfecerint competenter et cum vestrarum testimonio litterarum, harum seriem continentium, ad sedem venerint apostolicam absolvendi, et insuper tam prefatos militem et domicellum nominatim quam quoscumque alios, ipsum abbatem detinentes, aut detineri mandantes vel facientes, necnon omnes et singulos qui dictas pecunias seu partem earum a dicto abbate extorserint, seu ab eo, vel alio seu aliis pro eo receperunt seu habuerunt, ex parte nostra, generaliter publice coram populo per vos, vel alium seu alios moneatis, ut infra competentem terminum, quem eis prefigetis, dictum abbatem pristine, ut premittitur, libertati, omnesque pecuniarum summas et res alias sic ab eo extortas, habitas seu receptas, eidem abbati quibuscumque juramentis ac promissionibus et obligationibus per eum, ut premittitur, prestitis et factis, que quidem juramenta tenore presentium relaxamus, ac promissiones et obligationes nullas et irritas nunciamus nequaquam obstantibus omnino restituant, et alias de premissis per eos commissis debitam satisfactionem impendant; et, si infra dictum terminum id non impleverint, in eos excommunicationis sententiam proferatis et eam faciatis, ubi et quando expedire videritis, usque ad satisfactionem condignam solenniter publicari, ipsorumque omnium hujusmodi monita non implentium terras, opida, castra, villas et loca, et illa etiam in quibus capitaneatum aut regimen habent seu exercent subiciatis ecclesiastico interdicto, et alias eos ad predicta omnibus viis et modis, quibus melius et efficacius de jure poteritis, necnon contradictores quoslibet et rebelles per censuram ecclesiasticam, appellatione postposita, compellatis, invocato ad hoc, si opus fuerit, auxilio brachii secularis. Ceterum, si forsan predictorum hujusmodi sacrilegii et excessuum patratorum, eaque fleri mandantium, aut eorum nomine vel mandato facta rata habentium, presentia pro monitione et compulsione hujusmodi seu citatione de ipsis facienda secure haberi nequiret, vobis monitionem et requisitionem hujusmodi et citationes quaslibet per edicta publica in locis affigenda publicis, de quibus sit verisimilis conjectura, quod ad notitiam citatorum et monitorum hujusmodi pervenire valeant faciendi plenam concedimus tenore presentium potestatem, et volumus quod monitiones, citationes et requisitiones hujusmodi perinde ipsos citatos, monitos et requisitos, ut premittitur, citent ac si eis facte et insinuate presentialiter et personaliter extitissent. Non obstantibus tam felicis recordationis Bonifacii Pape VIII, predecessoris nostri, in quibus cavetur ne aliquis extra suam civitatem vel diocesim, nisi in certis exceptis casibus et in illis, ultra unam dietam a fine sue diocesis ad judicium evocetur; seu quod judices, a sede deputati, predicta extra civitatem et diocesim, in quibus deputati fuerint, contra quoscumque procedere, seu alii vel aliis vices suas committere, aut aliquos ultra unam dietam a fine diocesis eorumdem trahere non presu- mant, aut de duabus dietis in concilio generali quam aliis quibuscumque constitutionibus a predecessoribus nostris Romanis Pontificibus tam de judicibus delegatis quam personis ultra certum numerum ad judicium non trahendis, aut aliis editis que vestre possent in hac parte jurisdictioni aut potestati ejusque libero exercitio quomodolibet obviare, seu si aliquibus communiter vel divisim ab eadem sit sede indultum, quod interdici, suspendi vel excommunicari non possent per litteras apostolicas non facientes plenam et expressam, ac de verbo ad verbum, de indulto hujusmodi mentionem.
Datum apud Villamnovam, Avenionensis diocesis, II nonas augusti, anno tertio.
Informations
Acte
Clara
Lenne
(CIHAM (UMR 5648)), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 27371 (aposcripta-4078), http://telma.irht.cnrs.fr/chartes/aposcripta/notice/27371 (mise à jour : 17/05/2024).