Général
-
Innocent III (1198-1216)
-
L'abbé Walter et les frères du monastère de la Sainte-Croix de Waltham
-
X kalendas augusti, indictione II, anno MCXCIX, pontificatus anno secundo
-
-
Latran
-
Titre, général (littere gratiose, cum filo serico)
-
[n.c.] . ?
-
[n.c.] . ?
-
[n.c.] . ?
-
Christopher R. Cheney, Mary Cheney, The Letters of Pope Innocent III (1198-1216) Concerning England and Wales. A Calendar with an Appendix of Texts, Oxford : Clarendon Press, 1967, n. 162 p. ??.
-
Christopher R. Cheney, Mary Cheney, The Letters of Pope Innocent III (1198-1216) Concerning England and Wales. A Calendar with an Appendix of Texts, Oxford : Clarendon Press, 1967, n. 162 p. ?.
-
? [].
-
Innocentius etc. dilectis filiis Waltero abbati ecclesie sancte Crucis de Waltham eiusque fratribus tam presentibus quam futuris regularem vitam professis inperpetuum. Iniunctum nobis a deo licet inmeritis apostolatus officium nos hortatur et amonet pro universarum ecclesiarum statu satagere et eis paterne provisionis gratiam exhibere, et cum ex hoc simus omnibus debitores illis tamen ecclesiis preter commune debitum specialiter tenemur intendere in quibus fraterna caritas et regularis disciplina servatur, et que ad Romanam ecclesiam nullo mediante pertinere noscuntur apostolice dumtaxat potestati ac ditioni subiecte. Intelleximus autem quod cum Henricus illustris quondam Anglorum rex ecclesiam vestram que est sicut semper fuit capella regum Anglie studio pietatis inductus a bone memorie Alexandro papa predecessore nostro institui obtinuerit in canonicam regularem et libertatem quam ab antiquo habuerat quod clerici videlicet ibidem servientes a quo malebant ad ordines promovebantur episcopo, et quod per diocesanum episcopum nec decanus aut canonici seculares ipsius ecclesie fuerint aliquando instituti, a felicis recordationis Lucio papa predecessore nostro eidem ecclesie confirmari, et in ius et protectionem Romane ecclesie sicut specialem filiam recipi postulaverit, idem predecessor noster credidit de benignitate Sedis apostolice eius precibus annuendum. Nos quoque in hac parte vestris iustis postulationibus annuentes prefatam ecclesiam in specialem filiam et ius et protectionem [fo. 148r] Romane ecclesie ad eiusdem pontificis necnon Urbani, Clementis, et Celestini predecessorum nostrorum exemplar suscipimus et presentis scripti privilegio communimus; statuentes ut quascunque possessiones, quecunque bona eadem ecclesia in presentiarum iuste et canonice possidet aut in futurum concessione pontificum, largitione regum vel principum, oblatione fidelium seu aliis iustis modis prestante domino poterit adipisci firma vobis vestrisque successoribus et illibata permaneant; in quibus hec duximus exprimenda vocabulis: ecclesiam de Windeshores cum pertinentiis suis, ecclesiam Omnium sanctorum de Hertford cum pertinentiis suis et libertatibus, quas libertates Henricus rex secundus, Henricus et Ricardus, filii eius reges, vobis concesserunt, villam que dicitur Stanstede cum pertinentiis suis, terram quam Gaufridus et Willelmus filii Roberti vobis dederunt in villa que dicitur Melnho et Dunton., terras {207}quas rex Henricus vobis emit in Waltham ad dilatandam curiam vestram, Siwardeston. cum omnibus pertinentiis suis, Eppinges et ecclesiam cum pertinentiis suis et libertatibus et liberis consuetudinibus cum quibus eam possidetis, Walterum de Geldeford filium Alwrun et domum suam cum suis pertinentiis, veteres possessiones ipsius ecclesie de Waltham, scilicet terram que dicitur Nortdlande, mansiones canonicorum secularium et prata his mansionibus adiacentia, scilicet Nordmade, Chelnosheie, maiorem wardam et minorem, pratum quod dedit Philippus de Swinesheia, pratum quod dedit Gaufridus pincerna de Enefeld, pratum quod dedit Alexander de Enefeld, pratum quod dedit Portehors, pratum quod dedit uxor Willelmi de Halifeld, decimas feni de toto prato dominii de Waltham, molendina ipsius ville, in Epping. terram quam tenuit Bruning. presbiter de canonicis, decimas dominii regis eiusdem ville, et ipsam ecclesiam cum suis pertinentiis, terram Eliot eiusdem ville, duas scrutlandas de Nasing. cum ecclesia et pertinentiis suis in eadem villa, decimas de Langehrige, manerium de Netleswelle et ecclesiam cum suis pertinentiis, Passefelde et ad illam pertinentia, Waldam et eiusdem ville ecclesiam cum pertinentiis suis, Tipedene [fo. 148v] cum suis pertinentiis, terram quam dedit Unfridus de Barentun. ipsi ecclesie de Waltham, terram de Lamburn., et decimas de Purlai: hec in Exessia. In Hertdforsira: Wurmeleiam et ecclesiam cum pertinentiis suis, libertatibus et liberis consuetudinibus cum quibus eam possidetis, Brikendon. cum suis pertinentiis, terram quam Gaufridus monachus dedit vobis in Emwelle. In Bedefordsire: Ailrichesheiam cum ecclesia et suis pertinentiis, Melnho cum suis pertinentiis, in Dunthon. terram quam camerarius de Dunthun. ipsi ecclesie contulit. Et in Berkesire Westwaltham cum omnibus suis pertinentiis, duas solandas de Walcfare cum pertinentiis suis, Upministre cum pertinentiis suis, terram quandam de socagio eiusdem ville que reddit viginti unum denarios, Wudeford et eius ecclesiam cum suis pertinentiis, Alwardestun. et Luketun. cum ecclesia et scrutlanda cum pertinentiis suis, capellam de Epping. sicut eam canonice possidetis. In Lincolniensi diocesi ecclesiam sancti Petri de Wrengle cum pertinentiis suis. In Heliensi diocesi ecclesiam sancti Petri de Badburgeham cum pertinentiis suis. In episcopatu Norwicensi ecclesiam sancti Andree de Geiste et ecclesiam Omnium sanctorum de Geistetorp, et tertiam partem ecclesie sancti Petri de Wudenorton. cum pertinentiis suis, et medietatem ecclesie de Scerninges cum pertinentiis suis. Et preterea perpetuam firmam ville de Waltham et de Nasing. cum pertinentiis suis, libertatibus, immunitatibus, et liberis consuetudinibus libere et quiete et integre inperpetuum possidendam sicut Ricardus quondam rex Anglorum illustris carta sua vobis confirmavit vobis et ecclesie vestre auctoritate apostolica confirmamus. Sane novalium vestrorum que propriis manibus vel sumptibus colitis sive de nutrimentis vestrorum animalium nullus a vobis decimas exigere vel extorquere presumat. Interdicimus etiam ut nullus archiepiscopus vel episcopus aut eorum officiales sine mandato Romani pontificis aut legati ab eius latere destinati in vos vel ecclesiam vestram seu clericos vestros in vestra maiori ecclesia ministrantes ex-[fo. 149r]communicationis, suspensionis, aut interdicti sententiam promulgare presumat. Quod si factum fuerit auctoritate apostolica irritum habeatur nec in ea pontificalem in aliquo exerceat potestatem, sed eandem ecclesiam sub iurisdictione Romani pontificis perpetuo manere censemus. Liceat quoque vobis pro dedicatione basilice vestre seu capellarum que infra eius septa habentur et consecratione altarium benedictione abbatum ordinatione canonicorum et clericorum vestrorum pro crismate et oleo sancto et aqua episcopali atque in aliis sacramentis ecclesiasticis que vobis fuerint necessaria catholicum quem malueritis advocare vel adire episcopum qui apostolica fultus auctoritate quod postulatur indulgeat, nec malitiose hoc denegare presumat. Liceatque vobis clericos vel laicos liberos et absolutos e seculo fugientes ad conversionem recipere et eos in ecclesia vestra sine contradictione qualibet retinere. Prohibemus insuper ne ulli fratrum vestrorum post factam in eodem loco professionem fas sit absque abbatis sui licentia de claustro vestro discedere; discedentem vero absque communium litterarum cautione nullus audeat retinere. Paci quoque et tranquillitati vestre paterna sollicitudine providere volentes auctoritate apostolica constituimus ut nullus infra ambitum locorum seu grangiarum vestrarum furtum vel rapinam committere, violentiam facere, ignem apponere, seu hominem temere capere aut interficere audeat, libertates preterea ab eisdem predecessoribus nostris per autentica privilegia eidem venerabili loco concessas nos auctore deo ratas et inconvulsas in posterum volumus conservari. Obeunte vero te nunc eiusdem loci abbate vel tuorum quolibet successorum nullus e fratribus ibi qualibet surreptionis astutia seu violentia preponatur nec ad eiusdem loci regimen {208}extraneus assumatur, nisi forte, quod absit, in loco ipso idonea persona ad [fo. 149v] huiusmodi officium non possit repperi sed de congregatione ipsa et quem fratres communi assensu vel fratrum maior pars consilii sanioris secundum dei timorem et beati augustini regulam libera voluntate providerint eligendum. Tempore quoque vacationis secundum R. quondam illustris Anglorum regis concessionem abbatiam vestram et omnia omnino ad ipsam pertinentia in propria manu et custodia vestra remanere et per aliquos fratrum vestrorum quos prior et conventus ad hoc elegerint interim universa precipimus dispensari et ne aliqua persona exterior contra confirmationem ac inhibitionem nostram in vos vel possessiones vestras cuiuslibet occasionis titulo manum extendat auctoritate apostolica districtius prohibemus. Sepulturam preterea ipsius loci liberam esse decernimus, ut eorum devotioni et extreme voluntati qui se illic sepeliri deliberaverint, nisi forte excommunicati vel interdicti sint, nullus obsistat, salva tamen iustitia illarum ecclesiarum a quibus mortuorum corpora assumuntur. Decernimus ergo ut nulli omnino hominum liceat prefatam ecclesiam temere perturbare aut eius possessiones auferre aut ablatas retinere, minuere, seu quibuslibet vexationibus fatigare, sed omnia integra conserventur eorum pro quorum gubernatione ac sustentatione concessa sunt usibus omnimodis profutura, salva Sedis apostolice auctoritate et diocesanorum episcoporum in aliis ecclesiis vobis subiectis canonica iustitia. Si qua igitur etc. [fo. 150r]. Cunctis autem etc. Amen. Amen. Amen. Datum Laterani, per manum Reinaldi Acherontini archiepiscopi cancellarii vicem agentis xmo kalendas augusti indictione ii, incarnationis domini anno mmo c xc viiii pontificatus domni Innocentii pape iii anno ii.
-
Inconnue de Potthast.
Informations
Acte
Ponzio
Manon
(Université Lumière de Lyon), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 176303 (aposcripta-27001), http://telma.irht.cnrs.fr/chartes/aposcripta/notice/176303 (mise à jour : 17/05/2024).