Général
-
non renseigné
-
Le chancelier de l'église de Paris
-
n. c.
-
-
n. c.
-
Mandement (littere cum filo canapis)
-
[Registre de la chancellerie apostolique] Collectio Marini de Ebolo in Arch. S. Petri de Urbe C. 117, fol. 196b, et quidem in margine inferiori. Deest in cod. Arch. Vat. — Epistola caret temporis nota et inscriptione nominis papae. Ad an. 1275, Martii 25, quidam fr. Johannes supprior prioratus de Charitate nominatur. Cf. De Lespinasse, Cartul. du prieuré de la Charité-sur-Loire, p. 261, n° 125. Epistola haud facile post praedictum annum scripta est, nec etiam ante an. 1259, quo primus magister Ord. Cluniac. laudatur (supra n° 340). Quod ad cancellarium attinet charta optime congrueret aetati magistri Stephani (circa an. 1263 usque 1268). De initiis Collegii Cluniacensis Parisiis vide supra n° 375, nota.
-
Ici reprise de Henri Denifle, Émile Châtelain, Chartularium Universitatis Parisiensis. I. Ab anno MCC usque ad annum MCCLXXXVI, Paris : Delalain, 1889, n. 465, p. 536 [en ligne].
-
?
-
?
-
Summus pontifex cancellarium Parisiensem hortatur ut fr. Johanni de Lixiaco, Cluniacensis Ordinis, licentiam in theologia regendi tribuat.
-
Dilecto filio cancellario ecclesie Parisiensis.
Virtutum1 intenta cultui sacra religio Cluniacensis Ordinis, cui ex providencie divine consilio ille confessor altissimus gratia Benedictus et nomine, cujus odor sidereus per orbem longe lateque diffusus preeminentia claritatis irradiat, preclarum dedit initium et admirabile contulit incrementum, sancte religionis decore prefulget et precellentium rutilans operum sanctitate, Deo placidum se exhibet et apud alios gratiam gloriose opinionis effundit, circa cujus revera statum eo perspicacius acie apostolice considerationis extendimus, ejusque prosperitate eo desiderabilius affectamus, quo per eam tam sedi apostolice quam universali ecclesie ampliores fructus honoris accedunt et potioris utilitatis proveniunt incrementa. Inter hujusmodi enim religionis angelice professores, cujus orbem terre spatiosa latitudo complectitur, personas decet omnibus inveniri temporibus que thesauro scientie splendeant sicut rutilant sanctitate, ut ex utriusque concursu luminis tanti dignitas Ordinis taliter illustretur quod in declaranda scientia fidei et roboranda operum disciplina sui desiderii sanctitate proficere valeant, Ordo ipse sit semper in lucem gentium et perempnis glorie mereatur augmentum. Sane porrecta nobis ex parte dilectorum filiorum abbatis et conventus monasterii Cluniacensis .. diocesis petitio continebat quod nos olim ad ipsorum supplicationis instantiam te per alias nostras litteras rogandum duximus et hortandum, per apostolica tibi nichilominus scripta mandantes ut dilecto filio J. de Lixiaco, suppriori prioratus de Caritate dicti Ordinis, Autisiodorensis diocesis, qui librum Sententiarum legerat solempniter Parisius septem annis tunc elapsis, et reputabatur ydoneus ad obtinendum licentiam in theologica facultate, si eum invenires ydoneum, ordine qui servari consuevit in talibus observato, in ea sibi licentiam hujusmodi largiaris. Et licet postmodum eisdem per te receptis litteris prefatus J. servato hujusmodi ordine ad optinendum licentiam ipsam adeo repertus fuisset ydoneus ut in eum majoris partis magistrorum in dicta facultate regentium et non regentium super hoc vota concurrerent, tu tamen sibi dictam licentiam concedere pro tue voluntatis libito distulisti, quamvis ab eadem etiam majori parte fuisset propterea legitime ac humiliter supplicatum, ut super hoc per nostras litteras expressius tibi scribere dignaremur.
Nos igitur, qui eorundem abbatis et conventus in hac parte supplicationibus libenter annuimus, nolentes imperfectum deseri quod de ipso Johanne laudabiliter noscimur inchoasse, quin potius volentes eum pietatis paterne studio in hujusmodi suo voto laudabili favorabiliter promovere, quo prudenter attendit quod scientiarum generosa possessio in plures dispersa non deperit et distributa per partes minorationis detrimenta non sentit, sed eo diuturnius perpetuata senescit, quo publicata fecundius se diffundit, distributa quoque incrementum suscipit, et avarum dedignata possessorem nisi publicetur elabitur, et propter hoc donum scientie sacre pagine sibi a Domino creditum tanto docendo accumularet uberius, quanto diligentius legendo aliis studiosius erogaret, post diutinos labores exactos in hujusmodi sacre pagine studio ad magisterii gradum ferventer aspirat : quocirca discretionem tuam rogando monemus et hortamur attentius per apostolica tibi scripta districte precipiendo mandantes quatinus attendentes provide, quod aurum dispersum rutilat melius quam signatum, nichilque a vilibus tophis gemme differunt nisi deducantur in medium, nec sunt claudendi doctrine rivi sed, juxta Salomonem, « deriventur fontes tui foras et aquas tuas in plateis divide », si dictus Johannes ordine qui servari consuevit in talibus observato per depositiones magistrorum Parisius in dicta facultate regentium et non regentium vel majoris partis eorum reperiatur ydoneus ad hujusmodi licentiam obtinendam, eidem Johanni licentiam ipsam absque dilacionis obstaculo ac difficultatis obice largiaris. Non obstantibus quibuscumque privilegiis, indulgentiis et litteris apostolicis cancellario ecclesie Parisiensis, qui est pro tempore, aut eidem ecclesie vel universitati magistrorum et scolarium Parisiens. concessis seu statutis et consuetudinibus cancellarii ecclesie ac universitatis predictorum contrariis, juramento, confirmatione Sedis apostolice vel quavis firmitate alia roboratis, per que presentibus non expressa vel totaliter non inserta largitio dicte licentie impediri valeat quomodolibet vel differri et de quibus quorumcunque totis tenoribus oporteat in eisdem nostris litteris plenam et expressam ac de verbo ad verbum fieri mentionem.
Hujusmodi autem preceptum nostrum sic prompte absque difficultatis obstaculo ob reverenciam dicte Sedis et nostram executioni demandes ac efficaciter adimplere procures, quod super hoc aliquatenus de negligentia vel inobedientia reprehendi non valeas, quin potius a nobis et eadem Sede proinde commendari merito tamquam devotionis et obedientie filius merearis. -
1. Hoc initium epistolae, demptis quibusdam lectionibus variantibus, congruit cum initio litterarum Innocentii IV pro Cisterciensibus supra n° 133 editarum.
-
n. c.
Informations
Acte
aposcripta
admin
(IRHT), dans
APOSCRIPTA database
APOSCRIPTA database – Lettres des papes, dir. J. Théry, CIHAM/UMR 5648, éd. électronique TELMA (IRHT), Orléans, 2017 [en ligne], acte n. 164554 (aposcripta-16988), http://telma.irht.cnrs.fr/chartes/aposcripta/notice/164554 (mise à jour : 07/12/2022).