« Acte des exécuteurs testamentaires de Clémence de Hongrie »
Général
-
-
Exécution testamentaire
Identification du témoin
-
Exécution testamentaire
FranceParisArchives NationalesK//42, n° 8bisOriginal
Sceau
-
non
Analyses
-
Accord entre les exécuteurs testamentaires de Clémence de Hongrie et les abbé et religieux de Saint-Denis, relativement à un legs de trente livres de rente.
Texte
-
A tous ceus qui ces lettres verront. Nicole de Cailloue, arcediacre de Laon, Pierre de Villepereur, chevalier, et Guillaume de Fourqueus, arcediacre de Beaugency, exequteurs du testament et de la darraine volenté de bonne mémoire notre très chiere et amee dame madame Clemence, par la grâce de Dieu jadis royne de France et de Navarre, salut. Comme notre dite dame de qui Diex ait l’ame, ait ordenné et voulu en son dit testament ou sa darraine volenté, et ait donné et laissié a l’abbé et au couvent de Saint Denys en France trente livres parisis de rente, a prendre et a avoir a touz jourz perpetuelment desdiz religieux sus la rente que ladite royne avoit a Wardes en Normandie, lesquelles elle voult que il preissent chascun an sus toute s’autre terre de Normandie par tout le temps de la vie monseigneur Jehan de la Fresnoye, chevalier, auquel elle avoit donné chascun an de rente a vie tant seulement, cent livres parisis sus ladite terre de Wardes, pour faire chanter chascun jour perpetuelment une messe des morz en ladite eglise de Saint Denys, en une determinee chapelle, par un des moines de leur eglise, pour les ammes de noble mémoire le roy Looys, jadis roy de France et de Navarre, jadis son seigneur et mari, et pour la feue ame et pour celles de touz ses amis. Et nous, qui par la volenté et commandement de notre très chier et très redoubté seigneur monseigneur Philippe, par la grâce de Dieu roy de France, ce par la vertu dudit testament, pour l’absence d’aucuns des autres exequteurs nommez u dit testament, et pour ce que li autre ne s’en veulent estre entremis, et qui pour le grand desir que nous avons de l’accomplisssement du darrain vouloir de notre dite dame, avons esté chargié du fais et de la charge de ladite exequcion, aiens traitié et parlé aus diz abbé et couvent de ladite messe faire, et pour ce que le couvent de ladite eglise et les personnes singulieres dudit couvent estoient et sont a present trop chargiez de messes, tant pour noz seigneurs et dames les roys et les reynes de France trespassez et estanz en vie, comme pour leurs frères et leur bienfaiteurs trespassez, et pour moult d’autres causes, et deubtent encore estre plus chargiez u temps a venir, ne se vodrent pas bien assentir audis fais porter. Si avons accordé ce fait avec lesdiz abbé et couvent, se il plait a notre dit très redoubté seigneur le roy, que une chapellainie soie perpetuelment en ladite eglise, en la nuefve chapelle Saint Looys, en laquelle aura un prestre chapalain especial et perpétuel qui chascune semaine perpetuelment chantera trois messes des morz pour les ames dudit monseigneur le roy Looys et de ladite royne et de touz leurs amis, lequel chapalain aura chascun an vint livres parisis de rente par sa main de ceus qui ladite terre tiennent ou tiendront u temps a venir, et dis livres parisis de rente perpetuelle seront commises et paiees au pitancier de ladite abbaie pour pitance au couvent, pour faire chascun an en icelle eglise l’anniversaire de ladite royne, le troiziesme jour d’octobre qu’elle trespassa, ou le plus prouchain jour d’icelui que il pourra estre fait, soit avant, soit après. Et des maintenant, par la vertu dudit testament et par le pouvoir que donné nous est de elle par ledit testament, de esclaircir et interpréter se aucune chose y avoit doubtable ou obscure, tant comme exequteur dudit testament et u non d’icelle exequcion, fondons ladite chapellainie et ledit anniversaire. Baillons et assignons, tant comme nous pouvons en nons est, audit pitancier u non de la pitancerie, et pour ladite pitance faire audiz religieux lesdites dis livres, et audit chapelain lesdites vint livres parisis de terre et de rente perpétuelle a prendre et avoir chascun an dicens pitancier et chapellain perpetuelment sus la terre de Wardes en Normandie, après la mort dudit monseigneur Jehan de la Fresnoye, chevalier, et des maintenant jusques au trespassement dudit chevalier, sus toute la terre que ladite royne avoit en Normandie au jour de son trespassement, pour faire ce que dessus est dit, c’est assavoir lesdites dis livres parisis pour faire ladite pitance le jour que ledit anniversaire sera fait, et lesdites vint livres parisis au chapelain que ledit abbé de Saint Denys et ses successeurs establiront en ladite chapellainie pour chanter chascune semaine trois messes perpetuelment. Lesquelles trente livres parisis, ceus ou cil qui tendront ladite terre de Normandie paieront audit pitancier et chapelain chascun an a touz jours, lendemain de la Touz Saint en l’eglise monseigneur saint Denys. Et de ce faire nous les chargons par la vertu dudit testament, en tant comme nous pouvons et devons et appartendra et sera la collation et le don de ladite chapellainie de plain droit audit abbé et ses successeurs. Et pour ce que ices choses soient gardees perdurablement, nous avons supplié a notre très chier et très redoubté seigneur le roy de France, que il li plaise de sa grace lesdites choses louer et approuver, et a icelles donner force et vertu se aucun deffaut y avoit de sa auctorité et puissance royal et de toutes ices choses donner ses lettres et meittre son decret. En tesmoing desquelles choses, nous avons scellees ces presentes lettres de noz propres seauls. Donné l’an de grace mil trois cenz et trente, le juedi après le dimanche que l’on chante Oculi mei, septiesme jour de mars.
-
Traces de trois scellements sur double queue.
-
Clémence de Hongrie, reine de France
Louis X, roi de France
Philippe VI de Valois, roi de France
Nicole de Cailloue, archidiacre de Laon
Pierre de Villepereur, chevalier
Guillaume de Fourqueus, archidiacre de Beaugency
Jean de la Fresnaye, chevalier -
Vardes [commune de Neuf-Marché]
Normandie
Saint-Denis
Bibliographie
-
Rose-Marie Ferré, "Clémence de Hongrie (1293-1328) et les oeuvres pour la mort, Entre patronage religieux et revendications dynastiques", Murielle Gaude-Ferragu, Cécile Vincent-Cassy (dir.), La dame de cœur. Patronage et mécénat religieux des femmes de pouvoir en Europe (XIVe-XVIIe siècle), Rennes, PUR, 2016, p. 231-242.
Mariah Proctor-Tiffany, Portrait of a Medieval Patron : The Inventory and Gift Giving of Clemence of Hungary, Providence, Rhode Island, mai 2007.
Informations
Acte
Marie-Adélaïde
Nielen
(AN), dans
Actes des femmes de pouvoir
label.quote.actes-des-femmes-de-pouvoir