« Acte de Jeanne d'Evreux en faveur de l'abbaye de Longchamp »
Général
-
-
Abbaye de Longchamp
-
Acte de donation
Identification du témoin
-
Acte de donation
FranceParisArchives NationalesK//43/B, n° 21Original
Sceau
-
non
Analyses
-
Quittances de deux cents livres reçues par les religieuses de Longchamp de Jeanne d’Évreux, reine de France, pour être converties en rentes et employées à faire dire des messe pour l’anniversaire de Charles le Bel.
Texte
-
A tous ceuls qui ces presentes lettres verront et orront. Suer Marie de Lions, humble abbesse de Lonc Champ et tout le couvent de ce meisme lieu, salut en Nostre Seigneur. Comme tres haute et tres excellent dame madame la royne Jehanne, dernieres royne de France et de Navarre, jadiz espouse de tres haut et tres puissant prince de noble memoire le roy Charle que Dieux absoille, eust ordené par son testament a fonder son anniversaire perpetuelement en nostre dicte eglise, et pour son desir et devotion acomplir a son vivant nous ait presentement envoié deux cens livres tournois comptans pour rente acheter, et avec ce nous ait fait baillier dix livres tournois a une foys pour faire a present un service dont pitance sera faite au couvent, les quelles sommes nous avons receuez par la main monseigneur Nicole de Willy, son clerc, et en quitons nostre dicte dame, ses executeurs, le dit monseigneur Nicole et tous autres a qui quitance en puet appartenir. Et nous, a nostre dicte dame fait bailler les dictes deux cens livres tournois pour acheter rente soubz le roy, aus plus tost et plus brievement que trouver la pouvions afin que d'icelle rente, pitance soit faicte chacun an au couvent (le jour que son anniversaire sera fait= rayé). Et nous a nostre dicte dame acorde de faire admortir dix livres tournois de rente quant aquises les aurons soubz le roy, soit des dictes deux cens livres ou d'autres deniers. Sachent tuit que nous, considerans la bonne volenté de nostre dicte dame et la devotion que elle a [...] eglise et avons, les quelles choses nous donnent raisonablement in onoir a estre enclines d'acomplir ses bons propos et sainz desirs, en la regraciant et remerciant des biens et graces que elle nous a fait si charitablement et liberamment, li avons ottroyé et ottroyons de certaine science et par deliberation que nous avons eu sur ce en nostre (chapitele = rayé) chapitele, a chanter et faire celebrer chacun an tant comme elle vivra, une messe a note, une année du Saint Esperit et l'autre anné de Nostre Dame, pour elle et pour toutes les personnes que elle entent, c'est assavoir en un jour du moys de juing que mieux porra estre fait et qui mains sera chargez d'autre service, et en chacune des dictes messez sera faite propre oroison de mois pour l'ame de nostre tres chier seigneur le roy Charle, que Dieux absoille, jadiz son seigneur et espous. Et commencerons a faire le service pour nostre dicte dame en un jour de ce prochains moys de juing, et continuerons chacun an, elle vivant, en un jour du moys dessus dit. Et après son deces, ferons et serons tenuez de faire tous jours perpetuelment, une foys chacun an a tel jour comme elle trespassera se il est jour que l'en doie et puisse faire le service de mois, ou au jour plus prochain avant ou apres que faire se pourra l'anniversaire conjointement pour elle et pour le roy Charle son seigneur que Dieux absoille. C'est assavoir vegiles de mois a note, et lendemain la messe a note en couvent solennement. Et avec ce avons des maintenant nostre dicte dame son dit seigneur, leurs enffans et ceux que elle entent a tous jours acompaingnés et acompaingnons en toutes les messes, matines, heures, vegiles, prieres, oroisons, penitances et tous autres biens fais qui pour nous et nos successeresses seront fais en nostre dicte eglise tout aussint comme une de nos propre suers. Et [agreimguem sermete??] l'avons ainsy des maintenant fait enregistrer en nostre matrologe. Prometans loyalment et en verité de Dieu (et sanz l'obligacion des biens de nostre dicte eglise = rayé) les choses dessus dictes, bien et deuement executer et acomplir. Et samblablement promettons les dictes deux cens livres convertir en l'achat de la dicte rente au plus tot que donner la pourrons soubz le roy, pour en faire pitance au couvent chascun an aus jours que les diz services seront fais comme dit est. Et pour ce que ce soit ferme chose et estable a tous jours, nous abbesse et couvent dessus diz avons mis noz seaus en ces presentes lettres. Donné le deux jour de may l'an de grace mil troys cens quarante et deux.
-
Charles IV le Bel, roi de France
Nicolas de Willy, clerc
Marie de Lions, abbesse de Longchamp -
Abbaye de Longchamp
Informations
Acte
Lelde
Strake
(Sorbonne-Université), dans
Actes des femmes de pouvoir
label.quote.actes-des-femmes-de-pouvoir